Шығыс Қазақстан облысында 2030 жылға қарай тауарлық балық өндірісі 9,7 мың тоннаға дейін ұлғайтылмақ

Өңірде 2021–2030 жылдарға арналған, ҚР Үкіметінің 2021 жылғы 5 сәуірдегі №208 қаулысымен бекітілген Балық шаруашылығын дамыту бағдарламасы аясында аквамәдениет қарқынды дамып келеді. Онжылықтың соңына қарай облыс жыл сайын 9 774 тонна тауарлық балық өндіруді жоспарлап отыр. Оның ішінде 8 578 тонна албырт тұқымдастары, 1 151 тонна тұқы тұқымдастары және 45 тонна бекіре түрлері.

Бұл туралы ШҚО табиғи ресурстар және табиғат пайдалануды реттеу басқармасы басшысының орынбасары Мерхат Амиров ӨКҚ брифингінде хабарлады.

Албырт тұқымдастарын өсіру көлемінің артуына жобалық қуаттылығы 3 233 тонна болатын бес мамандандырылған балық учаскесі ықпал етпек. Тұқы тұқымдастарын өндіруді 15 көл шаруашылығы (378 т) және «БНВХ» ЖШС-нің тоған шаруашылығы (773 т) ұлғайтады. Ал бекіре түрлерінің көрсеткішін «ОстФиш» ЖШС-нің 45 тонна өнім беретін қолданыстағы шаруашылығы қалыптастырады.

Саланы дамытудың негізгі факторлары – жемшөп пен шабақ материалдары. 2030 жылға қарай жемшөпке деген қажеттілік 15 мың тонна деп бағалануда. Шаруашылықтар форель үшін импорттық жемді қолдануды жалғастыруда: 2025 жылдың тоғыз айында 720 тонна жем әкелінген. Тұқы тұқымдастарын азықтандыру үшін жергілікті өндірістің жемі пайдаланылады.

Шабақ материалдарына қажеттілік 16 млн дана болады. Өңірде қазірдің өзінде «ШығысУниверсал» ЖШС және «Гранд Фиш» ЖШС инкубациялық цехтары жұмыс істейді. 2025 жылы олар 2,3 млн форель шабағын өндірді. «ОстФиш» ЖШС өз күшімен 250 мың бекіре шабағын инкубациялады.

Соңғы төрт жылда облыста 6,2 мың тонна шабақ өсірілді, ал 2025 жылға арналған тауарлық балық бойынша жоспар 2 302 тонна. Ағымдағы жылдың тоғыз айында 1 310 тонна балық өндірілді, оның ішінде 1 015 тонна форель, 243 тонна тұқы, 2 тонна бекіре және 50 тонна шаян.

Салаға мемлекеттік қолдау жалғасуда. 2025 жылы кәсіпорындар 130,5 млн теңге субсидия алды, жыл соңына дейін тағы 138,9 млн теңге бөлінеді. Жалпы көлем 269 млн теңгеден асады. Бұдан бөлек, инвестициялық шығындар үшін 7,4 млн теңге қарастырылған. Былтыр субсидиялар көлемі 449 млн теңгені құраған.