Алтай ауданы туризмін дамытудың жаңа белесі: демалыс базалары,су электр станциялары және ірі инвестициялар

Алтай ауданы туризм саласын қарқынды дамытып, Бұқтырма су қоймасының жағалауын және айналаны жыл бойғы демалыс аймағына айналдырып жатыр. Бұл туралы аудан әкімі Ренат Курмамбаев Өңірлік коммуникациялар қызметінде өткен брифингте мәлімдеді.

Соңғы екі жылда ауданның демалыс базалары толық тексеруден өтті, 70 кәсіпкер салықтық есепке алынды, ал көрсетілген туристік қызметтердің көлемі 1,5 есе өсіп, 1 млрд 580 млн теңгені құрады. Аудан бюджетіне 2024 жылы түсімдер 254,9 млн теңге болып, 2023 жылмен салыстырғанда 7 есе артты (68 млн теңге).

«Altay Invest-2025» халықаралық инвестициялық форумында аудан 61,2 млрд теңге сомасындағы 4 меморандумға қол қойды. Оның ішінде екі су электр станциясының құрылысы (жалпы қуаты 45 МВт) үшін 45 млрд теңге, бір су электр станциясы (15 МВт) үшін 15 млрд теңге, Бұқтырма станциясында демалыс базасын салуға 400 млн теңге, ал «Гранд Фиш» ЖШС-ның Қытайға балық өнімдерін экспорттауына 800 млн теңге инвестиция жоспарланған.
Аудан туризмі барлық бағытта дамып келеді: жағажайлар абаттандырылып, су түбі сүңгуірлер арқылы тексеріліп, судағы белгілер орнатылып, құтқарушылар оқытылды. Жаңа Бұқтырма кентінде жолдар жөнделіп, электр желілері тартылды, санитарлық-гигиеналық нысандар жасақталды, ескі сауда павильондары алынды.

Альпілік стильдегі коттедж қалашықтары бой көтеріп, тауда атпен серуендеу, балық аулау, жаяу жолдар ұйымдастырылды, ал қыста туристерді тау шаңғысы трассалары, мұз айдыны және сырғанақтар қуантады. Алтай қаласынан 7 шақырым қашықтықта «Тенар» ШҚ тау шаңғысы кешені, арқан жолы, қонақ үй мен демалыс үйлері салынып жатыр. ӘКК «Алтай Хамир» пен ӘКК «Скаут» моншалары, қонақ үйлері мен ойын алаңдары бар белсенді демалыс базаларын дамытып, жазғы туристік ағын «Скаут» белсенді демалыс базасында 1 500 адамнан асты.

Сонымен қатар, ат спорты да қарқынды дамуда: «Кировский» ЖШС 50 орындық қонақ үй салып, классикалық ат спортына арналған жылқыларды өсірумен айналысуда.
2025 жылы туристік салаға салынған негізгі капиталдағы инвестициялар көлемі 229,5 млн теңгені құрап, Алтай ауданының ішкі және халықаралық туризм үшін өсудің маңызды орталығы екенін тағы бір мәрте дәлелдейді.