ШҚО-да «Шығыс Бизнес» бағдарламасы бастау алды: өңірлік жобаларды дамытуға жылдық 7% жеңілдікті несие
ШҚО-да кәсіпкерлікті қолдаудың жаңа өңірлік бағдарламасы – «Шығыс Бизнес» іске қосылды. Бұл бастама шағын және орта бизнесті дамытуда негізгі құралдардың біріне айналып, өңір экономикасының ең сұранысқа ие әрі перспективалы бағыттарына демеу береді. Бұл туралы ШҚО кәсіпкерлік және индустрия басқармасы басшысының орынбасары Досжан Болатбек Өңірлік коммуникациялар қызметінде өткен брифингте мәлімдеді.
Бағдарлама ШҚО Кәсіпкерлік және өнеркәсіп басқармасы, Кәсіпкерлер палатасы, «Ертіс» ӘКК АҚ және «Oskemen-Atameken» МҚҰ бірлесіп, облыс әкімінің 2025 жылғы 14 шілдедегі тапсырмасы бойынша әзірленді.
Бағдарламаның басты ерекшелігі – жылдық 7% жеңілдікті несие. Қаржылық қаражат инвестициялық жобаларды іске асыруға және айналым қаражатын толықтыруға бағытталады. Қаржыландыру облыстық бюджет пен жеке инвестициялар есебінен жүзеге асырылып, кәсіпкерлік сектордың қамтылуын кеңейтеді, соның ішінде Риддер мен Өскемен қалаларына қарасты ауылдық округтерде де мүмкіндіктер ашылады.
Бағдарлама аясында қаржыландыру екі бағыт бойынша жүзеге асырылады:
•20 000 АЕК-ке дейінгі жобалар – «Oskemen-Atameken» МҚҰ арқылы;
•20 000 АЕК-тен асатын жобалар – «Ертіс» ӘКК АҚ арқылы.
Несие алу басым бағыттар бойынша жүзеге асады:
•моноқалалардағы қызмет көрсету саласы;
•ағаш өңдеу өнеркәсібі;
•балық шаруашылығы және аквамәдениет;
•өзен кеме қатынасы, кеме жасау және жөндеу;
•жабдықтар мен арнайы техника өндірісі;
•тау шаңғысы туризмі;
•қонақ үйлер мен эко-демалыс базаларын салу;
•марал шаруашылығын дамыту;
•фармацевтика саласында фитотерапиялық препараттар өндіру.
ШҚО Кәсіпкерлік және өнеркәсіп басқармасы атап өткендей, «Шығыс Бизнес» бағдарламасы жаңа жұмыс орындарын құруға, инвестиция тартуға және өңір экономикасы ең қажет ететін жобаларды қолдауға мүмкіндік береді.