Нұрымбет Сақтағанов: «Абайдың сөздері даналықтың қазынасы және терең білімнің үлгісі»
Шығыс Қазақстан және Абай облыстарында қазақтың ұлы ақыны, философы және ағартушысы Абай Құнанбаевтың 180 жылдығына орай естелік іс-шаралар өтті.
Өскемен қаласының орталығында ойшыл ескерткішіне гүл шоқтарын қою рәсімі өтті. Облыс әкімдігінің, Қазақстан халқы Ассамблеясының өкілдері, қоғам белсенділері мен өңір тұрғындары қатысты.
«Абай сөздерінің өзектілігі қанша уақыт өтсе де өміршеңдігі мен құндылығын жоғалтпады. Оның әділдік, адамгершілік және ағартушылық туралы ойлары - бұл халықты біріктіретін және рухани жаңғыруға жетелейтін темірқазық», - деп атап өтті ШҚО әкімі Нұрымбет Сақтағанов.
Аймақ басшысы жыл басынан Шығыс Қазақстан облысында рухани-танымдық және мәдени-бұқаралық кластерді қалыптастыру бағытында белсенді жұмыстар жүргізілуде тілге тиек етті. Атап айтқанда, Өскеменде Абай ескерткіші қайта жаңартылды. Ал «Абайға құрмет» акциясы аясында ШҚО жұртшылығының қолдауымен Абай облысында қазақ жерінің ұлы ақынды еске алудың тағы бір символына айналатын жаңа саябақты абаттандыру жоспарлануда.
Абайдың 180 жылдығын атап өту ауқымды мерекелік іс-шаралар ақынның туған жерінде жалғасты. Абай облысы Қарауыл кентіндегі оның ескерткішіне гүл шоқтары қойылды. Салтанатты шараға ҚР Парламенті Сенатының спикері Мәулен Әшімбаев, Шығыс Қазақстан облысының әкімі Нұрымбет Сақтағанов пен Абай облысының әкімі Берік Уәли, сондай-ақ Мәжіліс депутаттары қатысты.
«Мұның бәрі той тойлау үшін емес, ой-өрісімізді кеңейтіп, рухани тұрғыдан дамуымыз үшін қолға алынды. Оның ой-толғамдары – халқымызға рухани азық, парасат биігіне жетелейтін жол», - деді Н.Сақтағанов.
Абай облысы ұйымдастырған Қарауылдағы ауқымды театрландырылған қойылымнан кейін ШҚО әкімі басқа қатысушылармен бірге «Абай – Шәкәрім» мемориалдық кешеніне, Жидебай шатқалындағы Абай үй-мұражайына барды.
«Абайдың әрбір сөзі - даналықтың қазынасы және терең білімнің үлгісі. Оның бай мұрасы ұлттың рухани жаңғыруына ықпал етеді», - деп түйіндеді ШҚО әкімі.
Айта кету керек, бүгінде ШҚО мен Абай облысында ғана емес, бүкіл Қазақстанда және одан тыс аумақта да мыңдаған адам бүкіл түркі әлемі үшін де өлмес мұраға айналған Абайды еске алу үшін жиналды.