ШҚО әкімі Ұлан ауданы нысандарына қатысты бірқатар тапсырмалар берді

Ұлан ауданына барған жұмыс сапары барысында Шығыс Қазақстан облысының әкімі Нұрымбет Сақтағанов Асубұлақ кентіндегі аудандық аурухана ғимаратының күрделі жөндеу жұмыстарының барысымен танысты, сондай-ақ Асу-Бұлақ орман шаруашылығына барды.

1970 жылы салынған ауруханада қазіргі таңда күрделі жөндеу жүргізілуде. Алғашқы медициналық-санитарлық көмек көрсететін амбулатория бір ауысымда 35 адамды қабылдауға есептелген, оған 1722 жергілікті тұрғын тіркелген, олардың 538-і есепте тұр.

«Әлеуметтік маңызы бар нысан болғандықтан, жұмыстың сапасын және белгіленген мерзімін сақтай отырып, оны уақытылы пайдалануға беру қажет», – деді Нұрымбет Сақтағанов Асубұлақ ауылындағы ауруханаға барған кезінде.

«Асу-Бұлақ орман шаруашылығы» КММ-де облыс әкімі мекеменің қызметімен танысып, орманшылықтағы техниканы қарап шықты. ШҚО әкімі өңірдегі орман шаруашылықтарына орманды қалпына келтіру жұмыстарымен белсенді айналысуды тапсырды.