Сыбайлас жемқорлықтың алдын алу – әрбіріміздің ортақ міндетіміз

Сыбайлас жемқорлық – мемлекеттің тұрақты дамуына, экономиканың өркендеуіне және қоғамның әл-ауқатына кері әсер ететін келеңсіз құбылыс. Сондықтан оған қарсы күрес тек құқық қорғау органдарының ғана емес, мемлекеттік қызметшілер мен әрбір азаматтың ортақ міндеті болып табылады.

Бүгінде елімізде «Заң мен тәртіп» қағидатын нығайтуға, мемлекеттік басқарудың ашықтығы мен тиімділігін арттыруға ерекше назар аударылуда. Мемлекеттік қызметтің басты мақсаты – халыққа сапалы қызмет көрсету, азаматтардың құқықтары мен заңды мүдделерін қорғау. Осы мақсатта мемлекеттік қызметкерлер өз қызметін адалдық, әділдік, ашықтық және жауапкершілік қағидаттарына сүйене отырып атқаруы тиіс.

Мұнайшы ауылдық округі әкімдігі қызметінде де осы қағидаттар басшылыққа алынады. Азаматтардың өтініштері заң талаптарына сәйкес қаралып, мемлекеттік қызметтер қолданыстағы заңнамаға сәйкес ашық әрі қолжетімді түрде көрсетіледі. Сонымен қатар тұрғындармен тұрақты кездесулер ұйымдастырылып, олардың ұсыныстары мен пікірлеріне ерекше мән беріледі.

Сыбайлас жемқорлықтың алдын алуда қоғамдық бақылау мен азаматтардың белсенділігі маңызды рөл атқарады. Әрбір тұрғын заң бұзушылыққа бейжай қарамай, адалдық пен әділдік қағидаттарын қолдаса, қоғамымызда жемқорлыққа жол берілмейді.

Адал еңбек, заңға құрмет және жоғары жауапкершілік – еліміздің тұрақты дамуының басты кепілі. Сондықтан баршаңызды заң талаптарын қатаң сақтауға, сыбайлас жемқорлыққа қарсы мәдениетті қалыптастыруға және әділетті қоғам құру жолында белсенді болуға шақырамын.

Т. Әбутәліп

Мұнайшы ауылының әкімі