Мұнайшы ауылында аудан әкімінің қатысуымен есептік кездесу өтті

⚜️Бүгін, 27 мамыр күні Мұнайшы ауылында Қарақия ауданының әкімі Сымбат Төретаевтың қатысуымен ауыл әкімінің жыл басынан бергі 5 айда атқарған жұмыстары бойынша есептік кездесуі өтті.

⚜️Кездесу барысында Мұнайшы ауылының әкімі Болат Бекмурзаев әлеуметтік-экономикалық даму, инфрақұрылым, кәсіпкерлік, санитарлық тазалық, білім беру, жұмыспен қамту, қайырымдылық және құрылыс бағыттары бойынша атқарылған жұмыстар жөнінде есеп берді.

⚜️Атқарылған негізгі жұмыстар қатарында:

• «Теңелбай Ата» қауымына апаратын 4 км жол тегістелді;
• Қазақ ауыл шағынауданына су құбыры тартылуда;
• 26 қоқыс жәшігіне темір қоршау орнатылды (жалпы жоспар – 40 дана);
• Жаңақұрылыс-1 шағынауданында ангар типтегі спорт залының құрылысы жүргізілуде (құны – 442,1 млн теңге);
• Айналма жол құрылысына жоба дайындалды (ұзындығы – 4,4 км, құны – 1,8 млрд теңге);
• «Мұнайшы» жазуы бар стелла құрылысы жүргізілуде (жалпы құны – 30 млн теңге, қазіргі келісімшарт – 17 млн теңге);
• Арбат құрылысы басталмақ (ауданы – 4800 м², құны – 39,2 млн теңге);
• Екі құдық қазылды (жоба құны – 14 млн теңге);
• Ескі тарихи қалдықтарды тазарту жобасы қолға алынған (құны – 13,4 млн теңге);
• Жаңа автобус бағыты іске қосылды: Жетібай – Мұнайшы – Құрық.

⚜️Сонымен қатар, ауылда 129 азаматтың әлеуметтік қолдау шараларымен қамтылғаны атап өтілді. Жеке кәсіпкерлер мен мекемелердің қолдауымен қайырымдылық акциялары, санитарлық тазалау және абаттандыру шаралары ұйымдастырылды.

⚜️Кездесу барысында тұрғындар сұрақтарын қойып, ұсыныстарын білдірді. Жиын ашық әрі тиімді диалог форматында өтті. Кездесуден кейін қатысушылар ауылда салынып жатқан бірқатар құрылыс нысандарын аралап көрді.

Қарақия ауданы әкімдігінің баспасөз қызметі