Болашақ мамандығы: Қарағандыда алғашқы ІТ-дәрігерлер дайындалды

Қарағандыда "IT-медицина" инновациялық білім беру бағдарламасының алғашқы 38 түлегіне дипломдар табысталды. Жас мамандар екі саланың – ақпараттық технологиялар мен денсаулық сақтау жүйесінің байланыстырушы буыны болады.

Бакалавриат деңгейінде жаңа білім беру бағдарламасын 2019 жылы екі ЖОО – Әбілқас Сағынов атындағы Қарағанды техникалық университеті және Қарағанды медицина университеті әзірлеп, ашқан болатын. Бүгінгі таңда осы мамандықты таңдаған 80 студент денсаулық сақтауда қолданылатын ақпараттық технологияларды, бағдарламалау құралдарын, мәліметтер базасын, биомедициналық ақпаратты өңдеу және талдау әдістерін үйренеді.

– Біздің елімізде медицинада көптеген заманауи ақпараттық технологиялар енгізілуде. Дәрігер зерттеу жүргізгеннен кейін деректерді өңдеу керек. "IT-медицина" білім беру бағдарламасы бірегей: Қазақстанда жоғары оқу орындары арасында мұндай ынтымақтастық жоқ. Бізде медициналық оқытумен техникалық оқытуды толықтыру жүріп жатыр. Оқу төрт жылға созылады. Біздің мамандар бірден екі салада Құзыретті болады. ІТ – дәрігер – болашақтың кәсібі, – дейді Әбілқас Сағынов атындағы Қарағанды техникалық университетінің Ақпараттық-есептеу жүйелері кафедрасының меңгерушісі Алексей Калинин.

Жаңа бағдарлама бойынша оқитын студенттер емханалар мен дәріханаларда тәжірибеден өтеді. Медициналық деректерді өңдеумен айналысатын ІТ-мамандарына үлкен қажеттілік бар. Сондай-ақ, ІТ-дәрігерлер республикалық медициналық зерттеу орталықтарында сұранысқа ие. Сондай-ақ оқуды жалғастыруға болады. Мысалы, Қарағанды медицина университетінің өмір туралы ғылымдар институтының "Биомедицина" білім беру бағдарламасына магистратураға түсуге болады.

– Биомедицина – бұл барлық жаратылыстану-ғылыми мамандықтардың өкілдерін шақыратын кең бағыт деп айта аламын. Бұған биоинформатика да кіреді – геном құрылымын математикалық әдістермен зерттеу және молекулалық-генетикалық механизмдерді, патологиялық процестердің механизмдерін және тағы басқаларын әртүрлі зерттеу. ІТ-дәрігерлер үшін де өз орны бар. Бұл алгоритмдерді құру, деректерді талдау, ақпараттық жүйелер, – дейді Қарағанды медицина университетінің стратегиялық даму және халықаралық ынтымақтастық жөніндегі проректоры Виктор Риклефс.

"ІТ-медицина" бағдарламасы бойынша оқығандар түскен университеттің дипломын алады. Бұл ақпараттық-коммуникациялық технологиялар бакалавры немесе денсаулық сақтау бакалавры. Әр дипломға екі университеттің пәндері мен бағалары бар екі транскрипт бар. Яғни, түлектердің шығу құзыреттілігі бірдей.

"IT-медик" білім беру бағдарламасы бойынша жоғары оқу орнын Тамырлан Алдунғаров қызыл дипломмен бітірген.

– Мен университетке түсуге дайындалып жатқанда, бағдарламашы болғым келді. ҰБТ тапсырдым және техникалық университетте менің салама сәйкес келетін бірнеше бағдарлама бар екенін білдім. Мені ІТ-медицина қызықтырды. Бұл бейінді және қиын мамандық. Менің ағам облыстық онкологиялық орталықта хирург-онколог болып жұмыс істейді. Мен жай бағдарламашы емес, өмірімді медицинамен байланыстырғым келетінін түсіндім. Оның үстіне, біздің елімізде осындай мамандардың жетіспеушілігі бар. Оқуды әрі қарай жалғастырғым келеді, дамимын, міндетті түрде магистратураға түсемін, – дейді 21 жастағы президенттік стипендиат Тамырлан Алдунғаров.

Биыл жаңа білім беру бағдарламасына талапкерлерді қабылдау жалғастырылады.