Қарағанды аялдамаларында автобус бағыттары бар ақпараттық стендтер пайда болды

Қарағандының жеті аялдамасында қоғамдық көлік қозғалысының сызбалары орнатылды. Осылайша Урбанистика орталығы жолаушылардың өмірін жеңілдету туралы шешім қабылдаған.

Қазақ және орыс тілдеріндегі жаңа тақтайшалар "19-шы орам", "Политех", "Станиславский атындағы театр", "№ 2 емхана", "Ерубаев көшесі" және "1000 ұсақ-түйек" (екі жаққа да) аялдамаларында орнатылды.

– Біз көп адамдарға автобус маршруттарын түсіну қиын деп ойладық. Барлық жолаушыларда ақпаратты көруге болатындай қол астында телефон бола бермейді. Телефон сөніп қалған жағдайлар да болып қалады, – дейді қалалық Урбанистика орталығының баспасөз хатшысы Айғаным Мұхамедрахымова. – Біздің схемалар туристерге, басқа елді мекеннен келген студенттерге ғана емес, жергілікті тұрғындарға да пайдалы болады. Олар автобуспен немесе шағын автобуспен қажетті аялдамаға қалай жетуге болатынын оңай түсіне алады. Мұндай маршруттық карталар әлемнің көптеген қалаларында орнатылған, оларды барлық жастағы адамдар пайдаланады.

Ақпараттық схемалар тұжырымдамасын бүкіл команда әзірледі. Жобаны орталықтың сәулетшісі Анна Касьян іске асырды.

Стендтер демеушіліктің арқасында пайда болды. Егер меценаттар болса, Қарағандыда ақпараттық стендтер орнату жалғасады.