Жаңаөзенде көпбалалы аналар «Алтын алқа» және «Күміс алқамен» марапатталды

6 мамыр күні Жаңаөзен қаласында ел демографиясын нығайтуға және ұлттық құндылықтарды сақтауға зор үлес қосып жүрген көпбалалы аналарға мемлекеттік наградалар салтанатты түрде табысталды.

Қазақстан Республикасы Президентінің 2025 жылғы 3 сәуірдегі №829 Жарлығы негізінде Жаңаөзен қаласы бойынша 17 анаға «Алтын алқа» және «Күміс алқа» мемлекеттік марапаттары тапсырылды.

Қала әкімінің орынбасары Нұрберген Худибаев көпбалалы аналарды шын жүректен құттықтап, олардың қоғамдағы айрықша рөлін атап өтті.

— «Ананың орны – әрдайым биік. Баланы тәрбиелеу арқылы қоғамды тәрбиелеп отырған аналарымыздың еңбегі өлшеусіз. Елдің ертеңі – бүгінгі ұрпақ десек, сол ұрпақты тәрбиелеп отырған Сіздерге алғысымыз шексіз», – деді қала әкімінің орынбасары.

Марапат иелері қала басшылығына көрсетілген құрмет үшін алғыстарын білдіріп, еліміздің өсіп-өркендеуі жолында балаларды тәрбиелеуді абыройлы міндет деп санайтындарын жеткізді.