Бұған дейін көлік құралдарын қайта тіркеу үшін автокөлікті сатып алу-сатудың нотариалды куәландырылған шарты қажет болатын. Енді мамандандырылған ХҚКО қызметкері электрондық құжатты жүйеде қалыптастыра алады, ал сатушы мен сатып алушы eGov mobile қосымшасының көмегімен QR – код сканерлеу арқылы құжатқа қол қоя алатын болады.
Айта кету керек, бұл қызмет «Азаматтарға арналған үкіметке» тиесілі. Бұл жаңашылдық қызмет алушылардың ыңғайлылығы мен жайлылығы үшін және көлік құралдарын тіркеу кезінде сыбайлас жемқорлықты жою мақсатында енгізілді. Енді Мемлекеттік корпорацияның, ҚР ІІМ және "ҰАТ" АҚ ақпараттық жүйелерінің ықпалдасуының нәтижесінде автокөлікті қайта ресімдеу процесі ашық болады. Мәмілені тіркеу кезінде жалған қол қою мүмкін емес.
Қызмет алушылар жүгінген кезде мамандандырылған халыққа қызмет көрсету орталығының операторы сатушы мен сатып алушы туралы, сондай-ақ көлік құралы жайлы мәліметтерді жүйеге енгізеді. Осыдан кейін жүйе автоматты түрде мәміленің электрондық жазбаша нысанын қалыптастырады және экранға QR код шығарылады. Оны сканерлегеннен кейін, автокөлікті сатушы және сатып алушы тараптар құжатпен танысып, оған ЭЦҚ көмегімен қол қоя алады.
Сондай-ақ, ұйымның мүдделерін білдіруге сенімхаты және ЭЦҚ пайдалану құқығы бар заңды тұлғалардың өкілдері үшін де бұл процесстің аналогы eGov business қосымшасы арқылы қолжетімді.
Осы тұста, көлік құралдарын қайта рәсімдеу кезінде мәміленің қағаз түріндегі жазбаша нысанын қабылдау ағымдағы жылдың 23 сәуірінде ҚР ІІМ көлік құралдарын тіркеу және есепке алу Қағидаларына өзгерістер мен толықтырулар енгізілгендіктен жойылғанын естеріңізге сала кетейік.
Telegram мобильді қосымшасында нақты уақыт режимінде мемлекеттік қызмет көрсету сапасына шағымданудың жаңа тетігі енгізілді. «EgovKzBot2.0» бот-платформасы арқылы мемлекеттік көрсетілетін қызметтер бойынша шағым беруге, бюрократияны азайту және бизнес-процестерді оңтайландыру жөнінде ұсыныс жолдауға болады.
ҚР Мемлекеттік қызмет істері агенттігі мен Цифрлық даму, инновациялар және аэроғарыш өнеркәсібі министрлігі азаматтарға арналған осы функцияны енгізуге бастамашы және әзірлеуші болды.
Ыңғайлы интерфейсі бар функцияны қолдану арнайы дағдыларды талап етпейді. Енді мемлекеттік көрсетілетін қызметтерді алу кезінде күрделі мәселелер туындаған жағдайда азаматтар «EgovKzBot2.0» Telegram-ботына мемлекеттік қызметті беруші мекеменің деректерін енгізіп, өз пікірлері мен ұсыныстарын немесе шағымдарын жібере алады. Мемлекеттік қызметті алу барысында артық құжаттарды талап ету, негізсіз бас тарту немесе уақтылы қызмет көрсетпеу және басқа да фактілер бойынша өтініш жіберуге болады.
Барлық келіп түскен шағымдар мен ұсыныстарды жауапты тұлғалар қарастырып, кері байланысты қамтамасыз ету арқылы мәселелерді қысқа мерзімде шешеді.
ҚР МҚІА Баспасөз қызметі
«Азаматтарға арналған үкімет» 2024 жылдың төрт айында 59 млрд теңге мөлшерінде 1,7 млн төлем өңдеді. Бұл сома биыл алғаш рет енгізілген жаңа төлемнің – жұмыс берушінің міндетті зейнетақы жарнасының сомасы.
Жұмыс берушінің міндетті зейнетақы жарналары 1975 жылдың 1 қаңтарынан кейін туылған әр қызметкер үшін табысының 1,5% мөлшерінде төленеді. Жарна алдымен «Азаматтарға арналған үкіметтің» шотына түседі. Мемлекеттік корпорация Әлеуметтік Кодекстің 17-бабына сәйкес әр салымшының барлық зейнетақы жарналарының есебін жүргізеді. Содан кейін ЖБМЗЖ сомасы үш жұмыс күннің ішінде Бірыңғай жинақтаушы зейнетақы қорындағы шартты зейнетақы шоттарына аударылады.
ЖБМЗЖ-ның он пайыздық зейнетақы жарналарынан (МЗЖ) айырмашылығы - бұл сома қызметкердің меншігі болып есептелмейді, капиталдандырылмайды және мұра ретінде қалдырылмайды.
Шартты жинақтар - зейнетақы жүйесіндегі қосымша деңгей. Зейнетақының бір бөлігін жұмыс берушінің міндетті зейнетақы жарналарынан алу үшін жүйеге қатысу өтілі 5 жылдан кем болмау керек. Бұл ретте жинақталған ЖБМЗЖ-ның біржолғы төлем сомасы 2 ең төменгі күнкөріс деңгейі мөлшерінен аспауы тиіс.
Кезектің электрондық талондарын алу сервисі 2022 жылдың сәуір айында енгізілді, өткен жылы 60 мыңнан астам талон алынған. Соңғы 5 айда бұл көрсеткіш айтарлықтай өсті: 2023 жылдың желтоқсанында пайдаланушылар 3 мыңға жуық талон алса, ал сәуірде – 12 жарым мыңнан астам талон алынған.
Айта кетейік, кезектің электрондық талонын "ХҚКО" қосымшасы арқылы ресепшн бағанындағы QR-кодты сканерлеу арқылы алуға болады. Ол үшін қосымша арқылы халыққа қызмет көрсету орталығына алдын ала онлайн брондау рәсімделуі қажет. Сондай-ақ, қызмет екінші деңгейлі банктің қосымшаларының бірінде қолжетімді.
"Мемлекеттік корпорация мемлекеттік қызмет көрсетуді цифрландыру бойынша белсенді жұмыс жүргізуде. Бүгінгі таңда көптеген қызметтерді үйден шықпай-ақ онлайн режимінде алуға болады. Егер тек ХҚКО-да көрсетілетін қызмет болса, онда кезекті алдын ала брондап, жазылған уақытта келуге болады. Бұл жағдайда ресепшендегі маманға жүгінудің қажеті жоқ. Азамат кезектің электрондық талонын өз бетінше ала алады. Осылайша, сіз көрсетілетін қызметті алушылардың уақытын ғана емес, сонымен қатар талондарды шығаруға кететін қағазды да үнемдей аласыз", - деді Мемлекеттік корпорацияның Басқарма Төрағасы Арман Кенжеғалиев.
Электрондық талондарды жиі қолданатын үш ХҚКО Алматы қаласының Медеу ауданында, Түркістан облысының Сайрам ауданында және Қарағанды қаласының Чкалов көшесінде орналасқан.
2024 жылы "Азаматтарға арналған үкімет " " ХҚКО " мобильдік қосымшасын қолдану тәжірибесін талдап, оны клиенттерге ыңғайлы болу үшін қайта өзгертуге ниетті. Қазіргі уақытта қосымшаның негізгі функциялары – кезекті электронды брондау және ХҚКО операторының бейнеқоңырауы арқылы мемлекеттік қызметтерді көрсету болып табылады.
Биыл Маңғыстауда 1 шілдеден бастап «Б» корпусының мемлекеттік әкімшілік лауазымдарына қызметкерлер жаңа ережемен қабылданады.
Мемлекет басшысының мемлекеттік қызметке іріктеу және қабылдау рәсімін жеңілдету, азаматтар үшін мемлекеттік қызметтің барынша ашықтығы мен қолжетімділігін қамтамасыз ету тапсырмасына орай, Агенттік мемлекеттік қызметке іріктеудің автоматтандырылған алгоритмін әзірледі. Бұл ретте, конкурстық рәсімді өткізуде толық цифрландыруды көздейтін «eqyzmet.gov.kz» порталы әзірленді.
Сәйкесінше, конкурстық рәсімнің барлық кезеңдері онлайн түрде қашықтықтан (24/7 – әңгімелесуден басқа) өткізіледі, оған азаматтар әлемнің кез келген нүктесінен және қалаған уақытында қатыса алады.
Жаңа іріктеу жүйесі пилоттық сынақтан 2023 жылдың 1 наурыздан бастап 5 мемлекеттік органда басталды. Өз кезегінде, сынақтан өткізу 2024 жылдың 1 ақпынан бастап қайта ұзартылып, мемлекеттік органдардың саны 22 ұлғайды.
Үміткерлерге мүдделер қақтығысы мен сыбайлас жемқорлық тәуекелдерін болдырмау үшін іріктеу кезеңдерінен өту кезінде анонимділікті қамтамасыз ету үшін ID-нөмір беру көзделген.
Сондай-ақ «адами фактордың» ықпалын болдырмау үшін конкурс рәсімнің ашықтығын тәуелсіз прокторинг жүйесі қамтамасыз етеді. Осылайша, жаңа іріктеу форматына сәйкес конкурстың қорытындылары ақпараттық жүйемен дербес шығарылады.
Тестілеу жүргізілетін нормативтік құқықтық актілердің саны екі есеге, яғни 9-дан 4-ке дейін қысқартылды. Бұл ретте, азаматтар тестілеу залдарына бармай-ақ, өзіне ыңғайлы уақытта және кез- келген жерде онлайн тапсыра алады.
Тестілеуде шекті мәнді еңсермеген қатысушылар тестілеуге үш күннен кейін және тестілеу тәртібін бұзған жағдайда бір айдан кейін қайта жіберіледі.
Тестілеуден сәтті өткен қатысушылар порталға тіркеліп, өздеріне қатысты деректер мен құжаттарды енгізе отырып, бос орындарға таңдау жасай алады.
Яғни, мемлекеттік органға ешқандай құжат жолдамайды.
Ұлт зиялысы Ә.Бөкейхановтың «Ұлтына, жұртына қызмет ету – білімнен емес, мінезден» деп атап өткендей, қазіргі таңда мемлекеттік қызметке қоғамның талабына сәйкес келетін кәсіби мамандарды тарту аса маңызды болып табылады.
Осы орайда, қатысушылардың құзыреттері мен қабілеттерін бағалауына басымдық беретін жаңа іріктеу жүйесі келесі кезеңдерді қамтиды:
Бірінші, жеке қасиеттерді бағалау. Бұл кезеңде жалпы 130 сұрақтан тұрады. Өту мәні жауаптардың растық деңгейі 50% кем болмауы тиіс. Қатысушылардың нәтижелеріне қарай 1-ден 2-баллға дейін беріледі.
Осы кезеңнен сәтті өткен үміткерлер екінші кезең мәтіндік және сандық ақпаратпен (SHL) жұмыс істеу қабілетін бағалауға жіберіледі. Аталған кезеңде әрқайсысы 25 сұрақтан тұратын екі блокты құрайды, барлығы 50 тапсырма беріледі. Өту шегі барлық 50 сұрақтың 10 дұрыс жауабын құрайды.
Қатысушылардың көрсеткен нәтижелеріне қарай 1-ден 5-ке дейін балл беріледі.
Осы кезеңнен кейін үміткерлердің жалпы санының жартысы, бірақ кемінде үшеуі эссе жазу кезеңіне жіберіледі. Егер эссе жазу кезеңі қарастырылмаса, онда үш қатысушы әңгімелесуге жіберіледі.
Үшінші кезең - эссе жазу.
Бұл басшылық лауазымдар үшін (А-1, В-1, С-1, С-О-1, C-R-1,D-1, D-O- 1, D-R1, E-1, E-R-1, санатына) міндетті кезең. Өзге лауазымдар үшін осы кезеңді қарастыру мемлекеттік органның өзі айқындайды. Мемлекеттік органның кадр қызметі эссе тақырыптарының тізімін қалыптастырады, ол жүйеде орналастырылады және жүйемен кандидаттың жеке кабинетіне жіберіледі.
Эссені үміткер жүйеде онлайн режимде тәуліктің кез келген ыңғайлы уақытында, жүйемен айқындалатын кестеге сәйкес жазады және мемлекеттік немесе орыс тіліндегі екі жүз сөзден аспайды.
Осы кезеңде конкурстық комиссия қатысушыларға 0-ден 5-ке дейін балл аралығында бағалайды. Шекті мән кемінде 3 баллды құрайды.
Соңғы төртінші кезең мемлекеттік органның конкурстық комиссиясында әңгімелесу:
Конкурстық комиссия құрамының үштен бір бөлігі бос лауазымның функционалдық бағыттарына сәйкес салаларда үш жыл жұмыс тәжірибесі бар бағалаушылардан тұрады. Әңгімелесу жүйемен үміткердің жеке кабинетіне жіберілген сілтеме бойынша бейнебайланыс режимінде жүргізіледі. Үміткерге бос лауазым бойынша және алдыңғы жұмыс орындарының қызметтік функционалдық бағыттарына сәйкес жеке қасиеттері тұрғысынан жалпы сипаттағы сұрақтар қойылады.
Яғни, заңнамада көрсетілген нақты талаптар бойынша кәсіби сұрақтар қойылмайды. Әңгімелесу қорытындысымен конкурстық комиссия қатысушыларға 0-мен 3-балл арасында баға енгізеді.
Нәтижесінде конкурс жеңімпазы барлық кезеңдердің қорытындысы бойынша жүйемен анықталады.
Бұл ретте, әңгімелесу кезеңіне жалғыз үмітер қатысып оның нәтижесі 1 баллдан кем болған жағдайда конкурс жеңімпазы анықталмайды.
-Атап өту қажет, қолданыстағы іріктеу жүйесі бойынша конкурсқа қатысушылардың үлесі орта есеппен бір орынға 1,7 адамды құраса, жаңа іріктеу жүйесі бойынша бір лауазымға қатысушы үміткерлердің орташа үлесі үш жарым есеге артып, 5,8 адамды құрады. Нәтижесінде, осы жоба бойынша мемлекеттік қызметке қабылданған азаматтармен сұхбат жүргізу барысында қатысушылардың басым бөлігі шынайы бәсекелестікке жол ашатын, іріктеу кезеңдеріне ыңғайлы уақытта қатысуға мүмкіндігін беретін, рәсімдері толық цифрландырылған іріктеу жүйесі бойынша оң пікірлерін білдірген. Агенттік жыл соңына дейін жаңа іріктеу жүйесін жетілдіру бағытында бірқатар өзгерістер енгізіп, оны келесі жылдың соңына дейін барлық мемлекеттік органдарға енгізуді жоспарлап отыр- дейді Мемлекеттік қызмет істері агенттігінің Маңғыстау облыстық департаменттінің басшысы Тоқтамыс Жұмағұлов.
Естеріңізге сала кетейік, қолданыстағы мемлекеттік әкімшілік лауазымға орналасудың тәртібі елімізде 2017 жылдың 21 ақпанында тәжірибеге енгізілді. Бұл ретте,осыған дейін 1 бірінші кезекте мемлекеттік қызметке үміткер алдымен заңнаманы білу тестілеуінен жергілікті департаментке барып өтуі тиіс болатын. Содан соң Агенттіктің интернет- ресурсында жарияланған /gov.kz/ бос жұмыс орындарын қарап, мемлекеттік органның электрондық поштасына өтініш, қызметтік тізімі мен білімі туралы құжаттардың нотариалды көшірмелерін ұсыну арқылы конкурсқа офлайн түрде қатысатын еді.
Жұмағұлов Тоқтамыс Қадошұлы
ХҚКО-лар мен мамандандырылған ХҚКО-лардың мамыр айындағы жұмыс тәртібі өзгереді, себебі, қазақстандықтар бұл айда үш мемлекеттік мерекені атап өтеді. Барлық халыққа қызмет көрсету орталықтары, соның ішінде мамандандырылған орталықтар 1, 7, 9 мамыр күндері жұмыс істемейді.
4 мамырда орталықтар кешкі сағат 18:00-ге дейін, кезекші орталықтар 20:00-ге дейін қызмет көрсетеді.
Ал, 8 мамыр күні тек кезекші ХҚКО-лар мен кезекші мамандандырылған ХҚКО-лар ғана жұмыс істейді. Жұмыс уақыты 13:00-ге дейін жалғасады.
10 мамырдан бастап фронт-офистер әдеттегі жұмыс режиміне оралады: ХҚКО-лар мен мамандандырылған ХҚКО-лар жұмыс күндері 9:00-ден 18:00-ге дейін, кезекші болып бекітілген орталықтар жұмыс күндері 9:00 – 20:00 аралығында, сенбі күні 9:00-ден 13:00-ге дейін жұмыс істейді.
2024 жылғы 23 сәуірден бастап еліміздің мамандандырылған ХҚКО-ларында көлік құралдарын тіркеу барысында міндетті нотариаттық куәландырылған көлікті сатып алу-сату шарттарын қабылдайтын болады. Бұл ретте мәміленің жазбаша нысаны жойылады.
Бұл өзгерістер мемлекеттік қызмет көрсету кезінде ашықтықты қамтамасыз етуге бағытталған. Айта кетейік, егер азаматтар қайта тіркеу үшін көлікті сатып алу-сату мәмілелерін нотариалды куәландырғысы келмеген жағдайда, олар екінші деңгейдегі банктердің қосымшалары арқылы көлік құралын онлайн қайта рәсімдей алады.
Сонымен қатар, 23 сәуірден бастап жүргізуші куәлігін алуға үміткерлер емтиханды тек автомектепті бітіргеннен кейін ғана тапсыра алады. А және В, сондай-ақ А1 және В1 санатындағы куәліктерге үміткер жүргізушілердің өзін-өзі даярлау арқылы емтихан тапсыруына мүмкіндік беретін тармақтар емтихандарды қабылдау және жүргізуші куәліктерін беру қағидаларынан алынып тасталды.
Енгізілген жаңашылдықтар көлік құралдарын тіркеу және есепке алу, сондай-ақ жүргізушілерді даярлау қағидаларына өзгерістер мен толықтырулар енуінің арқасында мүмкін болды. Бұл әкімшілік процестердің тиімділігін арттыруға және жол қозғалысы қауіпсіздігінің жоғары деңгейін қамтамасыз ету үшін қажет.
Өзгерістер "Жол қозғалысы туралы" Қазақстан Республикасы Заңының ережелеріне негізделіп, ҚР ІІМ Әкімшілік полиция комитетімен әзірленді. Қағидаға барлығы 53 түзету енгізілді.
Түзетулер жария талқылаудан, сыбайлас жемқорлыққа қарсы сараптамадан өтті және ІІО мен "Атамекен" ҚР Ұлттық кәсіпкерлер палатасының қызметі жөніндегі қоғамдық кеңеспен мақұлданды.
"Азаматтарға арналған үкімет" барлық көлік иелері мен жүргізуші куәлігін алуға үміткерлерді жаңа ережелермен танысуға кеңес береді.
Жаңартылған ережелердің толық мәтінімен порталда танысуға болады:
https://adilet.zan.kz/kaz/docs/V2400034240
«Азаматтарға арналған үкімет» Мемлекеттік корпорациясының Маңғыстау облысы бойынша филиал қызметкерлері кезекті сенбілік ұйымдастырды. Осылайша, қызметкерлер қаланың орталық аудандарынан ғана емес, сыртқы аймақтарынан да қоқыстарды тазартты. Барлығы 3 тоннаға жуық қоқыс шығарылды.
Сенбілікке қалалық және аудандық бөлімдерден барлығы 120-ға жуық ХҚКО қызметкерлері қатысты. Сонымен қатар, Мемлекет басшысының жолдауына сәйкес, аталмыш шараға облыстағы бірқатар мемлекеттік мекемелер мен кәсіпорындар ат салысты.
«Бұл біздің филиал қызметкерлерінің биылғы екінші сенбілігі. Өткен айда әр бөлім өзінің ғимараттарының ішкі және сыртқы аймақтарына тазарту жұмыстарын жүргізген болатын. Ал бүгін қала, аудандардағы бізге бекітілген жерлерді қоқсытан тазарттық. Қоқыс- табиғатты ластай отыра адам денсаулығына үлкен қауіп тудырады. Бұл әлемге ортақ экологиялық мәселе. Сондықтан әрбір азамат мұндай шараларда белсенділік танытып, бей-жай қарамауы керек деп ойлаймын» ,- деді Мемлекеттік корпорацияның Маңғыстау облысы бойынша филиал директоры Айбек Мұзбаев.
Сондай-ақ, филиал директоры мұндай акциялардың тұрақты түрде жалғасатынын айтты.
Ш. Есенов университетінің студенттері «Таза Қазақстан» экологиялық акциясының «Киелі мекен» аптасында Шерқала, Ақмыш сайы аумақтарында сенбілік ұйымдастырды, деп хабарлайды mangystaumedia.kz.
Бес аптаға созылатын «Таза Қазақстан» экологиялық акциясының алғашқы аптасы облысымызда сенбілік жұмыстары ұйымдастырылып, қала бойынша санитарлық тазалық жұмыстары жүргізілді.
Республикалық акцияның екінші аптасы «Киелі мекен» деп аталады. Бұл шара аясында Шерқала, Ақмыш сайы аумағына барған студенттер 50 қапқа жуық қоқыс жинады. Ұйымдастырушылардың айтуынша, бұл қоқыстар демалушылардан кейін қалған.
- Біз «Киелі мекен» апталығы аясында 30-ға жуық студент болып, киелі Шерқала, Ақмыш сайы аймақтарына келдік. Маңғыстаудың киелі аймақтарына бару көптен ойымда жүр еді. Міне, осы шара аясында Шерқала тауын да өз көзіммен көрдім. Бұл киелі таудың тарихына қатысты көптеген аңыз әңгімелерді естіген едім. Біз Ақмыш сайы аймағынан 30-ға жуық, Шерқала тауының етегінен 10 қап қоқыс жинадық. Студенттердің барлығы белсенді. Еліміздің осындай киелі аймақтарын көзіміздің қарашығындай қорғап, таза сақтасақ деген тілек-ниетіміз бар, - деді шараға қатысушы студент Айбек.
Сенбілікті ұйымдастырушылар тарихи орындарға демалып келуші туристер мен қонақтардан тазалықты сақтауын сұрайды.
- Маңғыстау тарихи орындарға бай, аспан асты мұражай өлкесі. Бұл аймақтарға бұрын демалуға келіп тұратын едік. Өлкемізде туризм саласы жылдан жылға дамып келеді. Әйтсе де бізді демалып келушілердің киелі, тарихи орындарға өз қоқыстарын тастап кетуі алаңдатады. Сондықтан, осындай сенбілік шараларын жиі ұйымдастырып тұруды жөн санаймын, - деді олар.
Айта кетейік, акция аясы 5 аптаға жоспарланған. Алдымыздағы «Жасыл аймақ» аптасында қалада жасыл желектерді көбейту бойынша жұмыстар атқарылады. Ал «Өнегелі ұрпақ» аптасында жас ұрпақты көгалдандыру жұмыстарына баулуға арналады. Акцияның соңғы «Мөлдір бұлақ» аптасында теңіз жағасында тазалық жұмыстары жүргізіледі.