Қазақстан мен Қытай ауыл шаруашылығы өнімдерінің экспорты саласындағы ынтымақтастықты нығайтуда

Бүгін Қытай Халық Республикасының Елшілігінде ҚР АШМ Агроөнеркәсіптік кешендегі мемлекеттік инспекция комитетінің Төрағасы мен қытайлық тарап өкілдерінің жұмыс кездесуі өтті. Күн тәртібіндегі негізгі мәселе қазақстандық ауыл шаруашылығы өнімдерін ҚХР нарығына экспорттаудың өзекті мәселелерін талқылау болды. Диалог барысында тараптар өнімнің сапасы мен қауіпсіздігіне қойылатын талаптарды, фитосанитарлық нормалардың қатаң сақталуын, сондай-ақ экспорттық құжаттарды ресімдеу тәртібі мен қажетті бақылау процедураларынан өтуді оңтайландыру мәселелерін қарастырды.

Келіссөздер аясында қазақстандық кәсіпорындарды ҚХР Бас кеден басқармасының (БКБ) тізілімдерінде жаңарту және тіркеу процесіне ерекше назар аударылды. Кездесуге қатысушылар 2026 жылғы 19 және 27 наурыздағы хаттармен қытай тарапына ресми түрде жолданған бидай мен арпа негізіндегі жем қоспаларын отандық өндірушілердің өтінімдерін қараудың ағымдағы мәртебесін талқылады. Сондай-ақ кәсіпорындардың жаңа тізімдері бойынша мәселелер қозғалып, ағымдағы жылдың сәуір айында жолданған қытайлық әріптестердің ескертулері бойынша атқарылған жұмыс нәтижелері қаралды. Қазақстан тарапы елдің экспорттық әлеуетін кеңейту үшін ұсынылған кандидатураларды барынша жедел қарауға мүдделі екенін білдірді.

Кездесу соңында қатысушылар екі елдің мүдделі ведомстволары арасындағы тиімді іс-қимыл мәселелері бойынша пікір алмасып, тұрақты экспорттық жеткізілімдерді дамыту бойынша нақты алдағы қадамдарды белгіледі. Тараптар сапалы қазақстандық өнімдердің қытай нарығына үздіксіз қолжетімділігін қамтамасыз ету үшін тығыз ынтымақтастыққа дайын екендіктерін растады, бұл аграрлық сектордағы стратегиялық серіктестік пен сенімнің жоғары деңгейін айқындайды.