Жастардың қаржылық мәдениеті

Орал қаласындағы №7 ЖОББМ алаңында БҚО бойынша Экономикалық тергеп-тексеру департаменті «Заң және тәртіп» тұжырымдамасы аясында оқушылар арасында қаржылық сауаттылықты арттыруға бағытталып, бірнеше кезеңнен тұратын форумды өткізді.

Бірінші кезеңде «Қаржылық сауаттылық – оқушылардың көзқарасымен» атты сурет көрмесі ұйымдастырылды. Онда оқушылар ақшамен жауапкершілікпен қарым-қатынас жасау туралы өз көзқарастарын ұсынды. Жұмыстар креативтілігімен және тақырыпты терең түсінумен ерекшеленді.

Екінші кезеңде блогерлер мен қоғам қайраткерлері сөз сөйлеп, қаржылық тәуекелдер, алаяқтық және маңызды қаржылық шешімдер қабылдаудағы жеке тәжірибелерімен байланысты өмірлік оқиғаларымен бөлісті.

Үшінші кезең департамент қызметкерлерінің баяндамаларына арналды. Олар дропперлік пен сим-бокстар сияқты өзекті тақырыптар туралы айтып, олардың қауіптілігі мен мүмкін болатын салдарын түсіндірді.

Форум соңында көрмеге қатысқан барлық қатысушыларға алғыс хаттар мен сертификаттар табысталды, ал алғашқы үш орынды иеленген жүлдегерлерге естелік сыйлықтар берілді.

Сондай-ақ оқушылар үшін Kahoot интерактивті ойыны өткізілді, оның қорытындысы бойынша үздік 10 оқушы сыйлықтарға ие болды. Форум қаржылық тұрғыдан сауатты ұрпақ қалыптастыруға ықпал ететін пайдалы әрі танымдық алаңға айналды.