ҚР Әділет министрлігінің өкілдері Гуанчжоу қаласында есірткіге криминалистикалық сараптама саласындағы ынтымақтастықты нығайту мәселелері жөніндегі семинарға қатысты

ҚР Әділет министрлігінің және «ҚР Әділет министрлігінің Сот сараптамалары орталығы» РМҚК өкілдері ҚХР да Есірткіні бақылау жөніндегі Ұлттық комиссиясының басқармасымен бірлесіп БҰҰ-ның Ауғанстандағы, Орталық Азиядағы, Ирандағы және Пәкістандағы Есірткі және қылмыс жөніндегі басқармасы (БҰҰ ЕҚЖБ) ұйымдастырған есірткіге криминалистикалық сараптама саласындағы ынтымақтастықты нығайту мәселелері жөніндегі Қытай-Орталық Азия семинарына қатысты.

Іс-шара есірткі құралдарын, психотроптық заттарды, олардың аналогтары мен прекурсорларын, оның ішінде Орталық Азия елдеріндегі жаңа синтетикалық есірткілерді сот-сараптамалық зерттеу әлеуетін арттыруға бағытталған. Семинар аясында есірткіні анықтаудың, сәйкестендірудің, талдаудың және профильдеудің озық әдістері, сондай-ақ тұрақты зертханааралық ынтымақтастықты дамыту мәселелері қаралды.

Қазақстандық делегация өкілдері қатысушыларды ұлттық бақылау жүйесімен, сот сараптамалары орталығының сот-криминалистикалық және талдамалық әлеуетімен, зерттеу және алдын алу әдістерімен, сондай-ақ осы саладағы жұмыстың тиімділігі мен халықаралық өзара іс-қимылды арттыру жөніндегі ұсыныстармен таныстырды.