ШЫМКЕНТТЕ 21 290 АЗАМАТҚА ТЕГІН ЗАҢ КӨМЕГІ КӨРСЕТІЛДІ

Шымкентте жыл басынан қазіргі таңға дейін 21 290 азаматқа тегін заң көмегі көрсетілді. Бұл — әділет органдарының халықтың құқықтық сауаттылығын арттыру, азаматтардың заңды мүдделерін қорғау бағытында атқарып жатқан жүйелі жұмысының нақты нәтижесі.

2025 жылдың қазіргі таңдағы қорытындысы бойынша Әділет департаменті заң қызметін ұйымдастыру, аттестациялау және тегін заң көмегін көрсету салаларында бірқатар маңызды жұмыстарды жүзеге асырды.

Тегін заң көмегі – азаматтарға нақты қолдау. Есепті кезеңде Әділет департаменті 81 адвокаттармен және 37 заң консультанттарымен тегін заң көмегін көрсету туралы келісімшарт жасады. 2025 жылға республикалық бюджеттен 191 430 000 теңге бөлініп, оның 174 573 000 теңгесі тиімді игерілді. Нәтижесінде заңда көзделген санаттағы 21 290 азамат білікті заң көмегіне қол жеткізді.

Тегін заң көмегі Қазақстан Республикасының заңнамасына сәйкес әлеуметтік тұрғыдан осал және қорғалуы қажет азаматтарға көрсетіледі. Нақтырақ айтқанда, ол келесі санаттарға арналған:

Тегін заң көмегін алуға құқылы азаматтар:

• Аз қамтылған азаматтар (табыс деңгейі ең төменгі күнкөріс деңгейінен аспайтындар)
• Мүгедектігі бар адамдар (I, II топ)
• Көпбалалы отбасылар
• Зейнеткерлер
• Ата-анасының қамқорлығынсыз қалған балалар
• Ұлы Отан соғысының ардагерлері және оларға теңестірілген тұлғалар
• Қамауда отырған немесе бас бостандығынан айырылған адамдар
• Қылмыстық және әкімшілік істер бойынша қорғауға мұқтаж азаматтар
• Асыраушысынан айырылған тұлғалар
• Тұрмыстық зорлық-зомбылықтан зардап шеккендер

 Қандай көмек көрсетіледі?

• Ауызша және жазбаша құқықтық кеңес
• Өтініштер, арыздар, шағымдар дайындауға көмектесу
• Сотта қорғау және өкілдік ету (заңда көзделген жағдайларда).