«ЗАҢ МЕН ТӘРТІП» ҚАҒИДАТЫН ІЛГЕРІЛЕТУ МАҚСАТЫНДА «ӘДІЛЕТ КЕҢЕС БЕРЕДІ» ТАҚЫРЫБЫНДА АШЫҚ ЕСІК КҮНІ ӨТТІ

Шымкент қаласында қиын жағдайға тап болған азаматтарға арналған «Көмек» дағдарыс орталығында «Әділет кеңес береді» тақырыбында Ашық есік күні өтті. Іс-шараның мақсаты – азаматтардың құқықтық сауаттылығын арттыру, мемлекеттік және электрондық қызметтер бойынша кеңес беру, сондай-ақ құқықтық көмекке қолжетімділікті қамтамасыз ету.

Іс-шараға келесі мекеме өкілдері мен мамандар қатысты:

* Шымкент қалалық Әділет департаментінің зияткерлік меншік құқығы бөлімінің бас маманы – М. Шері,
* Жеке сот орындаушы – А. Құдайберген,
* Нотариус – А. Ерімбет,
* Адвокаттар алқасының мүшесі – С. Жұмаділләев,
* «Азаматтарға арналған үкімет» мемлекеттік корпорациясының өкілі – А. Прманов.

Азаматтарға алимент өндіру, ажырасу, жеке куәлік рәсімдеу, ЖСН алу және өзге де құқықтық мәселелер бойынша заң шеңберінде кеңестер берілді.

Іс-шара барысында Әділет департаментінің көрсететін мемлекеттік қызметтері туралы ақпарат ұсынылды, сондай-ақ электрондық қызметтерді пайдалану мүмкіндіктері бойынша түсіндіру жұмыстары жүргізілді.

Сонымен қатар, азаматтардың құқықтық ақпаратқа қолжетімділігін арттыру және цифрландыру мақсатында жасанды интеллект негізінде арнайы агент әзірленіп, ол «Әділет» және «Е-заң көмегі» ақпараттық жүйелеріне енгізілгені хабарланды.