Алмалы және Бостандық аудандарында “Заң мен тәртіп” аясында Ашық есік күні өтті

Алматы қаласының Әділет департаменті “Заң мен тәртіп” акциясы аясында Алмалы және Бостандық аудандарында Ашық есік күнін ұйымдастырды.

Шараның мақсаты – азаматтарға құқықтық көмек көрсету, құқықтық сауаттылықты арттыру және мемлекеттік қызметтерге қолжетімділікті қамтамасыз ету. Ашық есік күні барысында аудан тұрғындары нотариат, адвокатура, заң көмегі, жылжымайтын мүлікті тіркеу, алимент өндіру және басқа да маңызды мәселелер бойынша білікті мамандардан кеңес алды.

Іс-шараға Әділет департаментінің қызметкерлерімен қатар Алматы қаласының құқық қорғау органдарының өкілдері қатысты. Қатысушылар азаматтардың құқықтық мәселелеріне нақты жауаптар беріп, оларды шешу жолдарын түсіндірді.

Азаматтар бұл бастаманы жоғары бағалап, мұндай іс-шаралардың жиі өткізілуін қолдайтындарын жеткізді. Ашық есік күні қоғам мен билік арасындағы сенімді нығайтуға және құқықтық мәдениетті қалыптастыруға бағытталған маңызды алаң болды.