Приречный ауылында 60 орындық жаңа балабақша ашылды

Жаңасемей ауданының Приречный ауылында 60 орынға арналған жаңа балабақша ашылды. Мектепке дейінгі білім беру мекемесі заманауи талаптарға сай жабдықталып, қауіпсіздік шаралары толық қамтамасыз етілген. Балалардың жан-жақты дамуына арналған оқу бағдарламалары мен ойын алаңдары қарастырылған.

Балабақшада тәрбие беру және оқыту процесін білікті мамандар жүргізеді. Ашылу рәсіміне аудан әкімі Алмас Тәнібекұлы, ата-аналар және ауыл тұрғындары қатысты.

Жаңа мекеменің іске қосылуы мектепке дейінгі білім берудің қолжетімділігін арттырып, ата-аналар үшін қолайлы жағдай жасайды.
Сонымен қатар, жақын арада Қайнар ауылында да заманауи балабақша ашу жоспарлануда.
Өткен жылы Озерки ауылында 70 орындық жаңа балабақша ашылған болатын.