Семейде қозғалыс үшін бірнеше көше ашылады

Ағымдағы жылы Мемлекет басшысының Семейдің Бас жоспарын әзірлеу және қаланың тарихи бөлігін сақтау туралы тапсырмасына сәйкес Абай облысының әкімшілік орталығының Бас жоспарын әзірлеу басталды. Семей қаласының жаңа бас жоспарында сауда жүргізіліп жатқан Аймауытов, Чехов, Шұғаев көшелерінің учаскелерін қозғалыс үшін ашу көзделіп отыр. Бұл туралы Абай облысының әкімі Нұрлан Ұранхаев қалалық сауда орындары мен базарлардың аумақтарын аралаған кезде хабарлады.

Қазіргі уақытта «Ақшың», «Арғымақ» және «Мереке» базарлары ауданында сауда контейнерлері, қоршаулар мен автотұрақтар орналасқандықтан қозғалыс қиын. Қаланың бұл бөлігі соңғы жылдары ең көп көлік ағынының орнына айналды. Орталық базар ауданында жолдармен жүрудің ашылуы көлік ағындарын қайта бағыттауға мүмкіндік береді, автомобиль кептелістерінің жиналуын болдырмайды. Осыған байланысты, қала тұрғындарының жүріп-тұруына және осы көшелер бойынша жол жүруді босатуға ыңғайлы болу үшін автовокзалды қаланың басқа бөлігі Алматы тас жолының шыға берісіне көшіру жоспарлануда. Семей қаласының басқа бөлігінде тағы бір автовокзалды орналастыру мүмкіндігі қарастырылуда.

Өңір басшысы аталған көшелердің жүру бөлігін босату бойынша барлық жұмыстар бизнестің мүдделерін ескере отырып, жоспарлы түрде жүргізілетінін атап өтті.

- Қалада тәртіп болуы керек, ол барлық қала тұрғындары мен Семей қонақтары үшін ыңғайлы және қауіпсіз болуы қажет. Көшелерде өтпелі қозғалысты ашу бойынша жұмыс қолданыстағы заңнамаға сәйкес қатаң жүргізілетін болады. Бұл ретте кәсіпкерлер үшін жаңа сауда орындары айқындалатын болады, - деп атап өтті өңір басшысы.

Семей қаласының Бас жоспарын әзірлеуді жыл соңына дейін аяқтау жоспарланып отыр. Аяқталғаннан кейін қоғамдық тыңдаулар, сондай-ақ экологиялық және мемлекеттік сараптамалар өткізіледі. Бас жоспар Үкіметтің қаулысымен бекітіледі.