Семейде Шымкент қаласының мәдениет күндері өтті
Екі күнге созылған Шымкент қаласының мәдениет күндері аясында бүгін Семейдегі Абай атындағы драма театрда «Шежірелі Шымкенттен – Ұлы Абай еліне» атты концерттік бағдарлама ұсынылды.
Гала-концерт алдында облыс әкімі Берік Уәли мен Шымкент қаласы әкімінің орынбасары Сәрсен Құранбек құттықтау сөз сөйледі. Аймақ басшысы оңтүстіктен келген қонақтарға, 200-ге жуық адамнан құралған арнайы делегацияны, өнерпаздарды жіберген Шымкент қаласының әкімі Ғабит Сыздықбековке
алғысын жеткізді.
«Қасиетті Абай еліне, Семей жеріне, тұңғыштар мекеніне қош келдіңіздер. Сіздерді Абай облысының шырайлы топырағында, мәдениетіміздің алтын қазынасына толы өлкемізде қарсы алу біз үшін үлкен қуаныш әрі мәртебе. Абай облысындағы Шымкент қаласының мәдени күндері – екі елдің өнері мен мәдениетін нығайтып, рухани байланыстарымызды тереңдететін тамаша мүмкіндік. Бұл сапарларыңыз екі облыстың мәдениет саласы арасындағы достық пен ынтымақтастықты жаңа белестерге көтеріп, шығармашылық байланыстарымызды одан әрі кеңейтеді деп сенемін. Мемлекет басшысы Қасым-Жомарт Кемелұлы Тоқаевтың үш жарым жыл бұрынғы тарихи шешімі, яғни әділдік орнатып, Абай облысын қайта құруы өңіріміздің тынысын ашып, көкжиегін кеңейтіп жатыр. Оған дәлел Абайдың 180 жылдығы аясында осымен төртінші облыстың өнерпаздары келіп, өнерлерін паш етіп, бұдан бөлек ауыл шаруашылық жәрмеңкелері өтіп, өңірлер арасында ынтымақтастық нығаюда. Қазан айында Шымкент қаласында Абай облысының мәдени күндері жоғары деңгейде өткен болатын. Сол сапар барысында Абай саябағына Тұрағұл Абайұлына ескерткіш тақта орнатылып, Шымкенттің көрермендері Абай театры сахналаған «Абай айтқан Еңлік – Кебек» қойылымын тамашалады. Бұл – екі облыстың өнерпаздары арасындағы бір – біріне деген құрметтің одан әрі күшеюіне үлкен септігін тигізді. Осы мәдени іс-шаралардың бәріне атсалысып, ұйымдастыруға үлес қосқан әріптесім Ғабит Әбдімажитұлына облыс жұртшылығы атынан айрықша алғысымды айтқым келеді. Абайдың 180 жылдығына орай Президенттің бастамасымен іске асып жатқан «Абайға құрмет» акциясын алғашқылардың бірі болып Шымкент қаласы қолдады. Семейге екі бірдей ғимарат салып бергелі отыр. Оның бірі Шығармашылық орталығы болса, енді бірі мәдениет үйі. Екі өңір арасындағы ынтымақтастық мұнымен тоқтап қалмайды. Алдағы уақытта жалғасын табады», –деді облыс әкімі.
Шымкент қаласы әкімінің орынбасары Сәрсен Құранбек өз сөзінде екі өңірдің ынтымақтастығы жаңа деңгейге көтерілгенін атап өтіп, қонақжайлық танытып, жылы қарсы алғаны үшін алғысын білдірді.
«Абай атамыздың 180 жылдық мерейтойы аясында шымкенттіктер осы өңірге осымен 4-інші рет келіп отырған жайымыз бар. Алғаш рет тамыз айында дүбірлі тойға келсек, екінші мәрте қыркүйек айында Жұмат Шанин атындағы Шымкент қалалық академиялық драма театры Семейде Абайдың өлеңдерінің негізінде «Желсіз түнде жарық ай» деп аталатын инценировканы қойған болатын. Сонымен қатар Шымкент қаласының музейлері мен кітапханалары арнайы келіп, көрме өткізді. Енді, міне, төртінші сапарда, ұлы ақынның 180 жылдығына символикалық мәнге ие 180 өнерпазбен келіп отырмыз», - деді ол.
Концертте Қазақ ұлт-аспаптар оркестрі, Шымкент цирк эстрадалық оркестрі, «Қаған» этно-фольклорлық ансамблі, «Қазына» халық би ансамблі, «Өркен» тобы, дәстүрлі әншілер және танымал эстрада жұлдыздары Ғазизхан Шекербеков, Бағылан Жолдасов пен Бота Әлімхан өнер көрсетіп, Шәмшінің әндерін әуелетіп, Сүгірдің күйлерін күмбірлетті.
Гала-концерт алдында жұртшылық Абай атындағы қазақ музыкалық драма театрында «Көне қала – Шымкент» тақырыптық көрмесін тамашалады. Экспозиция үш бөлімнен — «Көне Шымкент тарихы», «Этнография» және тарихи фотосуреттер топтамасынан құралған. Көрме барысында 2200 жылдық тарихы бар шаһардың көне дәуірден бүгінге дейінгі мәдени дамуы, археологиялық мұралары және рухани құндылықтары таныстырылды.