Семейде ақын Несіпбек Айтұлының 75 жылдығына орай «Сәуле ғұмыр» атты еске алу кеші өтті
Қазақтың көрнекті ақыны, Мемлекеттік сыйлықтың лауреаты, Қазақстанның еңбек сіңірген қайраткері, «Парасат», ІІІ дәрежелі «Барыс» ордендерінің иегері Несіпбек Айтұлын еске алуға арналған әдеби сазды танымдық кеш «Ес-Аймақ» рухани орталығында ұйымдастырылды. Шараға облыс әкімі Берік Уәли, өнер және мәдениет қайраткерлері, зиялы қауым өкілдері, ақынның жары мен ұрпақтары қатысты. Шымкент қаласының мәдениет күндері аясында облысымызға келген делегация өкілдері де шараны тамашалады.
Кешті Қазақстанның еңбек сіңірген қайраткері, «Дарын» мемлекеттік жастар сыйлығының, халықаралық «Алаш» әдеби сыйлығының иегері, белгілі айтыскер Дәулеткерей Кәпұлы жүргізді.
Кеште сөз сөйлеген аймақ басшысы ақынның шығармашылық мұрасының ұлттық руханияттағы алар орны зор екенін атап өтті.
«Біз бүгін айрықша нысаналы кешке, игі шараға жиналып отырмыз. Несіпбек ағаның қаламынан туған қайталанбас шығармалар қазақтың бірнеше буынының көкірегіне сәуле құйып, ұлттық рухын көтерді. Қаһарман тарихымызға деген перзенттік мақтаныш сезімін оятты. Руханияттың қазынасын байытып, қазақ тілінің көкжиегін кеңейтті. 40-тан астам поэма жазып, қазақ батырларына өлеңмен ескерткіш қойды. Айтұлының өлмес шығармалары бұдан кейін қазақ жұртымен бірге ғасырлардан ғасырларға жетіп, халқымыздың қадірлі қазынасы боларына бек сенемін», – деді облыс әкімі.
Еске алу кешіне Астанадан арнайы келген Парламент Сенатының депутаты Дархан Қыдырәлі Парламент Сенатының төрағасы Мәулен Әшімбаевтың құттықтау хатын оқып берді. Шара барысында жазушы, филология ғылымдарының докторы Тұрсын Жұртбай, ақын, Мемлекеттік сыйлықтың лауреаты Тыныштықбек Әбдікәкімұлы, белгілі күйші Секен Тұрысбеков жүрекжарды лебіздерін білдіріп, естеліктерін айтып, Несіпбек Айтұлына арналған жүрек тербетер жырлар оқылды.
Кеште «Дариға-ай» жастар театры Несіпбек Айтұлы шығармашылығына арналған қойылым ұсынды. Дәстүрлі әншілер Рамазан Стамғазиев, Айгүл Елшібаева, Ерлан Рысқали мен жергілікті өнерпаздар ақынның сөзіне жазылған әндерді орындады.