Семейде Шымкент қалалық әзіл-сықақ театры өнер көрсетті

Бүгін Шымкент қаласының мәдениет күндері аясында Шымкент қалалық әзіл-сықақ және сатира театры семейлік көрермендерге Уәлибек Әбдірайымовтың «Не істеу керек?» атты сазды-думанды музыкалық комедиясын ұсынды.

Замана тынысын дәл бейнелейтін, күлкі мен ойға толы бұл комедия қоғамдағы өзекті мәселелерді жеңіл юмормен жеткізе отырып, көрерменге «шын мәнінде не істеу керек?» деген өзекті сұрақты қояды.

Бұл шара өңірлер арасындағы мәдени ынтымақтастықты тереңдетіп, шығармашылық байланысты нығайтуға мүмкіндік берді.

Музыкалық қойылымда танымал сатира шеберлері — Уәлибек Әбдірайымов, Жүсіп Ақшора, Күннұр Қалмұрзаева, сондай-ақ Болат Әріпов, Асылжан Батталов, Ақсүйрік Хамза, Абылай Қыдыралиев, Бидәулет Батырбек, Данияр Исмаилов, Мұрат Жаңабеков және Байкен Құрманәлиев өнер көрсетті.

Ертең Абай атындағы театрда «Көне қала — Шымкент» тақырыптық көрмесі және Шымкент қаласы өнерпаздарының «Шымкент сазы» концерттік бағдарламасы қойылады.

Айта кетейік, осыдан 1 жарым ай бұрын облыс әкімі Берік Уәли бастаған өңір делегациясы Шымкент қаласына арнайы сапармен барған болатын. Сапар барысында Абай атындағы театр ұжымы «Абай айтқан «Еңлік-Кебек» спектаклін көрермендерге ұсынған еді.