7 мамыр: «Тәуелсіз елдің қорғаны»
Қалалық Мәдениет сарайында 7 мамыр – Отан қорғаушылар күніне орай «Тәуелсіз елдің қорғаны» мерекелік шарасы өтті. Кеш барысында Семей қаласы әкімінің міндетін атқарушы Бекжан Бапышев жиналған жұртты айтулы мерекемен құттықтады.
«Халқымызда «Ел қорғаны – ер аманаты» деген ұлағатты сөз бар. Бүгінгі бейбіт өмір мен тыныш тіршіліктің негізінде – ерлеріміздің ерен еңбегі мен батырлық рухы жатыр. Қазіргі азат күн – Ұлы Жеңістің жемісі екенін ұмытпауымыз керек. Біз, кейінгі ұрпақ, Ұлы Отан соғысы жауынгерлерінің ерлігін мәңгі ұмытпай, олардың рухына әрдайым тағзым етеміз», – деді Бекжан Бапышев өз сөзінде.
Шара аясында ел тыныштығын сақтау жолында еңбек етіп жүрген бірқатар қызметкерлер қала әкімінің «Құрмет» грамоталарымен марапатталды.
Мерекелік кештің соңын Қазақстанның еңбек сіңірген қайраткері Мапруза Утуленова, Парасат орденінің иегері Гүлдана Ноғайбаева және Мәдениет сарайының өнерпаздары әнмен әрлеп, көрерменге көтеріңкі көңіл күй сыйлады.