Семей қаласында Мемлекеттік рәміздер күніне арналған мерекелік шара өтті

4 маусым – Қазақстан Республикасының Мемлекеттік рәміздер күніне орай Семей қаласында «Тұғырлы рәміз – тұрақты қоғам» атты салтанатты іс-шара ұйымдастырылды. Мерекелік жиынға мемлекеттік мекемелер мен қоғамдық ұйымдардың өкілдері, ардагерлер, әскери қызметкерлер, жастар, сондай-ақ білім, мәдениет және спорт салаларының мамандары мен қала тұрғындары қатысты.

Іс-шараның ашылуында Мемлекеттік Ту көтеріліп, Қазақстан Республикасының Әнұраны шырқалды. Қатысушылар ел егемендігінің басты нышандары саналатын Ту, Елтаңба және Әнұранға құрмет көрсетті.

Салтанатты жиында сөз алған Абай облысының әкімі Берік Уәли мемлекеттік рәміздердің халықты біріктіретін, тәуелсіздікті айшықтайтын маңызды құндылық екенін атап өтті.

Сонымен қатар, Мемлекет басшысының бастамасымен жүзеге асырылып жатқан «Абайға құрмет» акциясы аясында Семей қаласындағы Бейбітшілік аралында Рәміздер алаңының құрылысы жүргізіліп жатқаны айтылды. Солтүстік Қазақстан облысының қолдауымен салынып жатқан нысанды Абай күні қарсаңында пайдалануға беру жоспарланған.

Мерекелік шара жергілікті өнерпаздардың қатысуымен өткен патриоттық әндер концертінен жалғасын тапты.