Семейде жаңа жылдық шырша шамы жағылды

Бүгін облыс әкімі Берік Уәли Семей қаласындағы орталық алаңдағы жаңажылдық бас шыршаның шамын жағу рәсіміне қатысты. Халықаралық, республикалық олимпиадалар мен спорттық сайыстардың, робототехника жарыстарының жеңімпаздары мен жүлдегерлері де шараға арнайы шақырылды.

Аймақ басшысы тұрғындарды алдағы Жаңа жыл мерекесімен құттықтап, ізгі тілегін жеткізді.

«Жаңа жыл – әр шаңырақ үшін ең жылы, ең жарқын мерекенің бірі. Мемлекет басшысы Қасым-Жомарт Кемелұлы Тоқаев «Халқымыз екі жылдың тоғысар тұсын ізгі ниетпен, ерекше көңіл-күймен күтеді. Өткен күндерді саралап, ескі жылға баға береді. Арман-мақсатын айқындап, болашаққа үлкен үмітпен қарайды. Бұл – нағыз отбасылық мереке» деп айрықша атап өткен болатын. Шын мәнінде, бұл – отбасы мүшелері бір дастарқан басына жиналып, өткен жылға шүкір айтып, келер күннен жақсылық күтетін сәт. Бүгін біз де осы алаңда бір үйдің баласындай, бір қолдың саласында болып, бас қосып, тату-тәтті, ырысы мен ынтымағы жарасқан өңір екенімізді тағы бір мәрте көрсетіп отырмыз. Өтіп бара жатқан 2025 жыл өңіріміз үшін нәтижелі болды. Алдағы жылға қойған мақсатымыз айқын. Келер жылы да өңіріміздің дамуын жалғастырып, жаңа жобаларды іске асырып, әр отбасыға жайлы, әр балаға қауіпсіз, әр азаматқа мүмкіндік беретін аймақ құру жолында белсене еңбек ететін боламыз», – деді облыс әкімі.

Жаңа жыл қарсаңында қала тұрғындарына мерекелік көңіл-күй сыйлау мақсатында демеушілердің қаражатымен орталық алаңдағы Арбат бойы жұлдызды аспан шамдарымен безендірілді. Шаһардың әрбір аудандарына 40-тан астам мафтар орнатылды. Сонымен қатар мемлекеттік және жеке кәсіпкерлік ғимараттар аймағы түрлі түсті жарықтармен әшекейленді.

Биыл облыста әлеуметтік маңызы бар нысандар бой көтеріп, жолдар жөнделді, елді мекендердің инфрақұрылымы жақсара түсті. Білім беру, денсаулық сақтау, мәдениет пен спорт салаларында нақты істер атқарылып, халықтың тұрмыс сапасын арттыруға бағытталған жұмыстар жүйелі түрде жүргізілді.

Шара соңында Әйгерім Қалаубаева, Әділет Жауғашар секілді эстрада жұлдыздары мен жергілікті өнерпаздар әннен шашу шашып, тұрғындарға мерекелік көңіл-күй сыйлады.