Семей қаласының мәдениет  саласы бойынша АҚПАРАТ

Іс-шаралар.

Бүгінгі таңда мәдени-демалыс қызметі бос уақытты ұйымдастырудың тәсілі ретінде ғана емес, мәдени саясатты жүзеге асыру институты ретінде де қарастырылады. Қазақстан Республикасының 2023-2029 жылдарға арналған мәдени саясат Тұжырымдамасын іске асыру мақсатында 2024 жылы жергілікті бюджеттен қаржыландырылатын мәдениет мекемелерінің ұжымдарымен 272950 адамды қамтитын 3344 іс-шара өткізілді.

Жыл басынан бері Ертіс өзенінің жағасында, 8 наурызда,  дәстүрлі құймақ пен концерттік бағдарламамен "Широкая масленница", Наурыз мейрамысияқты іс-шаралар өткізілді. Наурыз мейрамында 2024 жылғы мерейтой иелерінің атымен аталған ауылдар ұсынылды. Әр ауыл қала меценаттарының көмегі есебінен барлық азаматтарға ұлттық тағамдар ұсынды. Биылғы жылы жаңа форматта аниматорлардың, суретшілердің, сәндік-қолданбалы өнер шеберлерінің және т.б. қатысуымен Бейбітшілік аралында Қазақстан халқының бірлігі мерекесі өткізілді. Сондай-ақ, Отан қорғаушылар күні мен 9 мамыр, Мәдениет және өнер қызметкерлері күніне, Балаларды қорғау күніне, мемлекеттік қызметшілер күніне, Домбыра күніне, Астана күніне, Қала күніне, Конституция Күніне, Республика күніне және басқа да маңызды мерекелерге арналған іс-шаралар өткізілді.

Сонымен қатар, осы жылы қалада балалар арасындағы республикалық би конкурсы, сондай-ақ «Халықтық» атағын алған шығармашылық ұжымдардың есептік концерттері өтті. Қала өнерпаздары мен шығармашылық ұжымдары облыстық және республикалық конкурстар мен фестивальдерге белсенді қатысты. Қалада   Х Республикалық «Мир поющих рук» ым-ишара ән конкурсы өткізілді, оған Қазақстанның 17 облысынан 40 адам қатысты. Қалалық мәдениет сарайының өнерпаздары да түрлі халықаралық байқауларға қатысып, жетістіктерге жетті. «Ахау Семей» халықтық ансамблі Италиядағы Халықаралық достық фестиваліне қатысып, Әзербайжанның Баку қаласы мен Түркістан қаласында өткен халықаралық конкурстарда ГРАН-ПРИ жеңіп алды. «Ақ бота» халықтық би ансамблі Астанада өткен Халықаралық конкурста 1 және 3 жүлделі орындарды иеленді. Зағип және нашар көретін азаматтарға арналған «Шамшырақ» клубының ұжымы Алматы қаласында өткен Халықаралық «Екі жұлдыз» конкурсында 3 орын, Шымкент қаласында өткен республикалық «Қос қанат» конкурсында 2 орын, Қызылорда қаласында өткен көпжанрлы республикалық «Творчество без границ» конкурсында 2 орынды жеңіп алды. Бұл жылы алғаш рет Ана күні мен Әке күніне арналған іс-шаралар ұйымдастырылды. Сондай-ақ, Жаңа жылдық іс-шаралар жаңа форматында ұйымдастырылып өткізілді.

Тілдерді дамыту. Қазақстан Республикасы Үкіметінің 2023 жылғы 16 қазандағы № 914 Қаулысымен  бекітілген «Қазақстан Республикасында тіл саясатын дамытудың 2023-2029 жылдарға арналған тұжырымдамасын жүзеге асыру аясында  әзірленген жоспарға сәйкес іс-шаралар жүргізілуде.

Атап айтқанда, 22 Наурыз мейрамы аясында  Кенен Әзірбайұлының туғанына 140 жыл толуына арналған «Кенен оқулары» фестивалі ұйымдастырылды. Мемлекеттік тілді жетік  меңгерген өзге ұлт жастары арасында «Тіл-халық жанын танудың кілті»  байқауы, орыс сыныптарында қазақ тілін оқыту методикасын жетілдіру мақсатында, қазақ тілі мұғалімдері арасында ғылыми жоба байқауы, 21 мамыр - Мәдениет және өнер қызметкерлері күніне арналған, мәдениет мекемелері қызметкерлерінің арасында «Алаш мұрасы – ұрпаққа аманат» атты әдеби квест өткізілді. 10 тамыз - Абай күніне орай, мемлекеттік қызметшілер арасында «Абай мұрасы-адамзаттың байлығы» атты квиз, жас ақындардың «Поэзия! менімен егіз бе едің ...?» атты жыр мүшайрасы өтті.

5 қыркүйек - Қазақстан халқы тілдері мерекесіне арналған «Тілдер шеруі айлығы» және айлық аясында барлық мәдениет мекемелерінде мемлекеттік тіл мәртебесін арттыруға арналған шаралар ұйымдастырылды. Үш тілді жетік меңгерген жастарға қолдау көрсету мақсатында «Тіл шебері» конкурсы, мектеп оқушылары арасында «Полиглот» олимпиадасы ұйымдастырылды.

Сонымен қатар, «Қала күні -2024» мерекесі аясында жергілікті ақындардың шығармаларын мәнерлеп оқудан байқау, 25 қазан Республика күніне арналған «Ерікті елім-Қазақстаным» атты интеллектуальдық сайыс өтті. Мемлекеттік тілдің мәртебесін көтеру мақсатында балабақша тәрбиеленушілері арасында «Қазақшаң қалай балақай?»  фестивалі ұйымдастырылды. Мектеп оқушылары арасында өңірге танымал ұстаз Бәтташ Сыдықовқа арналған шешендік өнерден  сайыс өтті. 

Сыртқы жарнама мен көрнекі ақпарат мәтіндерін Қазақстан Республикасындағы тіл туралы заңнама талаптарына сәйкестендіру мақсатында 2024 жылы сәуір және қыркүйек айларында  «Сыртқа ілсең жарнама, ана тілін қорлама!» айлығы ұйымдастырылды. 

Айлық аясында  Шәкәрім, Әуезов даңғылдары, Б. Момышұлы, Мәңгілік ел,  Қабанбай батыр, М. Жұмабаев, А. Қозбағаров, Ә.  Найманбаев, М. Дулатов, Глинка  көшелері бойында орналасқан бизнес объектілеріндегі жарнама мен көрнекі ақпараттың заң талаптарына  сәйкестігін анықтау үшін мониторинг жүргізілді. Бұл жұмысқа БАҚ, қоғамдық ұйымдардың өкілдері,  мәслихат депутаттары тартылды. Азық-түлік дүкендері, супермаркеттер, сұлулық салондары, тамақтану орындары, дәріханалар, тіс емханалары, ХҚКО т.б сияқты  200-ге жуық  нысан қамтылып, «ҚР Тіл туралы» заңының талаптары түсіндіріліп, әдістемелік кеңестер беріліп, заңнама талаптары көрсетілген буклеттер таратылды.   

Көрнекі ақпаратқа жүргізілген  зерделеу жұмысының нәтижесінде    68  заң бұзушылық анықталып, бүгінгі күні 45 нысан өздерінің ғимараттарында орналасқан көрнекі ақпараттарды заңнама талаптарына сәйкестендірді. Сондай-ақ, 30-ға жуық мейрамханалар мен кафелерде ас мәзірінің және өзге де  ақпараттарда тіл туралы заңнама талаптарына сәйкестігіне мониторинг  жүргізілді. Жұмыс барысында бірқатарында ас мәзірі мен жұмыс кестесі орыс тілінде ғана жазылғандығы анықталды. Түсіндіру жұмыстарының нәтижесінде кемшіліктер түзетілді.