Абай облысы білім басқармасының басшысы лауазымына Ердембеков Бауыржан Амангелдіұлы тағайындалды

Бауыржан Ердембеков 1974 жылы Семей қаласында дүниеге келген. 1996 жылы Семей мемлекеттік университетін «Қазақ тілі мен әдебиеті» мамандығы бойынша, 2016 жылы Қазақ инновациялық гуманитарлық-заң университетін «Мемлекеттік және жергілікті басқару» мамандығы бойынша тәмамдаған. Филология ғылымдарының докторы, профессор.

Еңбек жолын 1991 жылы Жарма ауданы Асқаралы ауылындағы Лекеров атындағы мектепте мұғалім болып бастаған. Әр жылдары М.Әуезов атындағы Семей университетінің сырттай оқыту факультетінің деканы, проректоры, Л.Н.Гумилев атындағы Еуразия Ұлттық университетінің филология факультетінің қазақ әдебиеті кафедрасының меңгерушісі, С.Аманжолов атындағы Шығыс Қазақстан мемлекеттік университеті ректорының кеңесшісі, Қ.Жұбанов атындағы Ақтөбе өңірлік мемлекеттік университетінің ректоры, «Шәкәрім атындағы университеті» КеАҚ Басқарма төрағасы-Ректоры, «Абай және ұлттық руханият» ғылыми зерттеу орталығының бас ғылыми қызметкері болып еңбек етті.

Тағайындалғанға дейін «Шәкәрім атындағы университеті» КеАҚ қазақ филологиясы және журналистика кафедрасының профессоры қызметін атқарды.

Жалпы еңбек өтілі - 34 жыл.