«Менің құқықтарым мен міндеттерім»: жастар форумы өтті

Бесқарағай ауданында жастардың құқықтық сауаттылығын арттыруға және азаматтық жауапкершілігін қалыптастыруға бағытталған «Менің құқықтарым мен міндеттерім» атты жастар форумы өтті.

Форум екі кезеңде ұйымдастырылды. Іс-шараның бірінші кезеңі күннің бірінші жартысында Жастар ресурстық орталығы өкілінің қатысуымен өтті. Кездесу барысында қатысушылар бір-бірімен танысып, жастардың құқықтары мен міндеттеріне қатысты өзекті мәселелерді талқылады, сондай-ақ құқықтық сауаттылықты арттыруға және азаматтық белсенділікті дамытуға бағытталған интерактивті пікірталастарға қатысты.

Форумның екінші кезеңі аудан әкімінің орынбасары Алмас Тастенбековтің қатысуымен табиғат аясында, еркін форматта өтті. Мұндай формат жастар мен билік өкілдері арасында ашық әрі сенімді диалог орнатуға мүмкіндік берді. Қатысушылар азаматтық қоғамды дамытуға қатысты өзекті мәселелерді талқылап, өздерін қызықтырған сұрақтарын қойып, пайдалы кеңестер алды. Сонымен қатар жастар үшін көшбасшылық қасиеттерді дамытуға, командалық өзара іс-қимылды нығайтуға және қатысушылар арасындағы достық қарым-қатынасты қалыптастыруға бағытталған тимбилдинг ұйымдастырылды.

Өз сөзінде Алмас Тастенбеков:

«Әрбір азамат өз құқықтарын ғана емес, қоғам мен мемлекет алдындағы жауапкершілігін де терең түсінуі қажет. Құқықтық сауаттылық, белсенді азаматтық ұстаным және заңға құрмет – елдің табысты дамуының негізі. Қазақстанның болашағын бүгінгі жастар қалыптастырады, сондықтан қазірден бастап бастамашыл болып, жауапкершілік танытып, қоғамдық өмірге белсенді қатысу маңызды», – деп атап өтті.

Форум барысында заңнаманы сақтау, жеке жауапкершілік, жастардың қоғамдық өмірге қатысуы және жас буынның ел дамуындағы рөлі мәселелеріне ерекше назар аударылды.

Сонымен қатар форум аясында «Таза Қазақстан» республикалық бағдарламасы шеңберінде «Мөлдір бұлақ» экологиялық акциясы өткізілді. Акцияға қатысушылар аумақты тазалау жұмыстарына белсенді қатысып, қоршаған ортаны қорғауға және экологиялық мәдениетті қалыптастыруға өз үлестерін қосты.

Іс-шара туралы өз әсерімен жастар қозғалысының белсендісі Тұрғанбай Ерназар бөлісті:

«Форум біз үшін ашық пікір алмасуға және жаңа білім алуға мүмкіндік берген пайдалы алаң болды. Әсіресе жергілікті атқарушы орган өкілдерінің пікірін тыңдап, өзімізді толғандырған сұрақтарға жауап алғанымыз маңызды болды. Осындай кездесулер жастардың құқықтары мен міндеттерін тереңірек түсінуіне, жауапкершілік сезімін дамытуына және қоғам өміріне белсенді араласуына ынталандырады. Сонымен қатар форумның экологиялық акциямен толықтырылуы қоршаған ортаны жақсартуға нақты үлес қосуға мүмкіндік берді».

Форум жастар мен жергілікті атқарушы органдар өкілдері арасындағы ашық диалогтың тиімді алаңына айналып, құқықтық мәдениетті арттыруға, азаматтық белсенділікті дамытуға және қоғам мен туған өлкенің болашағы үшін жеке жауапкершілікті сезінуді нығайтуға ықпал етті. Табиғат аясында өткен екінші кезең іс-шараның мазмұнын байытып, білім беру, командалық жұмыстар және еркін қарым-қатынасты үйлестіре отырып, форумды қатысушылар үшін әсерлі әрі есте қаларлықтай етті.