Семей қаласының тұрғындары мемлекеттік қызметтерді үйден ала алады

Семей қаласының тұрғындары «Персоналды менеджер» қызметін пайдалана алады. Бұл қызмет арқылы мемлекеттік қызметтерді Халыққа қызмет көрсету орталығына бармай-ақ, үйде немесе кеңседе алуға болады. Бұл туралы Абай облысы бойынша «Азаматтарға арналған үкімет» мемлекеттік корпорациясының филиалы хабарлайды.

Қызмет көрсетуші маман көрсетілген мекенжайға — үйге немесе кеңсеге, өтініш берушіге ыңғайлы уақытта келеді. Персоналды менеджер құжаттарды қабылдап, кеңес береді және мемлекеттік ақпараттық жүйелер арқылы өтінішті рәсімдейді. Қызмет көрсетілгеннен кейін дайын құжаттарды ХҚКО-ның беру бөлімінен алуға немесе жеткізу қызметін рәсімдеуге болады.

Персоналды менеджер арқылы анықтамалар алу, тұрғылықты жері бойынша тіркелу және АХАТ қызметтері сияқты бірқатар қызметтерді рәсімдеуге болады. Сонымен қатар, міндетті түрде жеке қатысуды талап ететін қызметтер бұл форматта көрсетілмейді. Оларға паспорт, жеке куәлік, жүргізуші куәлігі және көлік құралдарын қайта тіркеу жатады.

Бұл қызмет ерекше қажеттіліктері бар азаматтар, қарт адамдар, кішкентай балалары бар ата-аналар және ХҚКО-ға баруға уақыты жоқ тұрғындар арасында сұранысқа ие.

«Біз көшпелі қызметтерге тұрақты қызығушылық бар екенін байқаймыз. Мұндай формат мемлекеттік қызметтерді қолайлы жағдайда алғысы келетіндер үшін өте маңызды», — деп атап өтті Абай облысы бойынша «Азаматтарға арналған үкімет» мемлекеттік корпорациясы филиалы директорының міндетін атқарушы Мұрат Өмірзахов.

«Персоналды менеджер» қызметінің үйге шығу құны 7 447 теңгені құрайды және оған ұйымдастырушылық және логистикалық шығындар кіреді.

Өтінімді мемлекеттік корпорацияның ресми сайты арқылы немесе 1414 бірыңғай байланыс орталығы арқылы беруге болады.