Көміртек тотығы (CO) — иіссіз, түссіз әрі дәмсіз газ

Ол отынның толық жанбауы нәтижесінде пайда болады және ең қауіптісі — оны адам сезе алмайды.

Қауіптілігі

Көміртек тотығы қан құрамындағы гемоглобинмен байланысып, ағзаға оттегінің жетуіне кедергі келтіреді. Аз мөлшерінің өзі улануға, тіпті өлімге әкелуі мүмкін.

Негізгі пайда болу көздері

• пештер, каминдер, қазандықтар, газ колонкалары;
• түтін мұржасының және желдетудің ақаулары;
• жабық орындардағы автокөліктер (гараж);
• генераторлар, мангалдар, жылытқыштарды үй ішінде пайдалану.

Уланудың белгілері

• бас ауруы, бас айналу;
• жүрек айну, әлсіздік;
• ұйқышылдық, сананың шатасуы;
• ауыр жағдайда — есінен тану.

Алдын алу шаралары

• түтін мұржалары мен желдету жүйесін тұрақты тексеру және тазалау;
• жабық бөлмелерде ашық отты және генераторларды қолданбау;
• гаражда автокөлікті қосулы күйде қалдырмау;
• тұрғын үйлерге көміртек тотығы датчиктерін орнату.

Улануға күдік болған жағдайда

1. Терезе мен есіктерді дереу ашып, таза ауаның келуін қамтамасыз етіңіз.
2. Адамдарды сыртқа шығарыңыз.
3. Жедел қызметтерді шақырыңыз.
4. Себебі жойылғанға дейін бөлмеге қайта кірмеңіз.

Бесқарағай ауданының ТЖБ