Аягөз қаласының қоғамдық көлік инфрақұрылымын дамыту жұмыстары жалғасуда

2025 жылы Аягөз қаласында 10 жаңа автобусты іске қосу жоспарланған. Бүгінгі күні олардың бірі қалаға жеткізіліп, пайдалануға берілді. Сонымен қатар, 2025 жылдың мамыр айында 4 автобус жеткізіліп, жолаушылар тасымалына қосылады деп күтілуде.

Қазіргі уақытта аудан ішінде 8 автобус 4 бағыт бойынша тұрақты түрде қызмет көрсетуде. Бұдан бөлек, ауылдар арасында — Тарбағатай, Баршатас, Ақшәулі және Сарыарқа бағыттарында — 7 автобуспен жолаушылар тасымалы жүзеге асырылып келеді.

Жаңа автобустар заманауи талаптарға сай жабдықталған және олардың техникалық сипаттамалары қалаішілік тасымалдың қауіпсіздігі мен жайлылығын қамтамасыз етуге бағытталған. Әр автобустың сыйымдылығы — 32 жолаушы, оның ішінде 18 отыратын орын қарастырылған.

Жаңа көліктердің пайдалануға берілуі қаланың көлік жүйесінің тиімділігін арттырып қана қоймай, тұрғындардың күнделікті жүріп-тұруын жеңілдетуге, жолдағы жүктемені азайтуға және экологиялық жағдайды жақсартуға оң әсерін тигізеді.