Облыс әкімі Берік Уәлиұлы бүгінгі жұмыс сапары барысында аудандық әлеуметтік қызмет көрсету орталығының салтанатты ашылу рәсіміне қатысты.

Облыс басшысы құттықтау сөз сөйлеп, осы ғимаратты мемлекет тарапына сыйлыққа беріп, игі іске себепкер болған Рахымбаев Сейфоллаға алғысын білдірді. Сонымен қатар, орталыққа 16 орындық инватаксидің кілтін табыс етті.

Осыдан кейін сөз алған, Рахымбаев Сейфолла жаңа нысанның жұмысына табыс тілеп, ел игілігіне қызмет жасай берсін деп ақжарма тілегін білдірді.

Орталықтың жалпы ауданы 310 шаршы метрді құрайды. Құрамында үш бөлімше жұмыс істейді. Жартылай стационар, үйде қызмет көрсету бөлімшесі, отбасын қолдау орталығы Жалпы 13 кабинет бар, 31 қызметкер жұмыс істейді.

Орталықта физиотерапия, емдік дене жаттығулары, массаж, психологиялық қолдау, сондай-ақ мүмкіндігі шектеулі жандарға арналған кешенді оңалту қызметтері көрсетілетін болады.