Қазақстанда Ұлттық ауыл шаруашылығы санағы онлайн кезеңінің аяқталуына 10 күн қалды

Қазіргі уақытта ел бойынша жүздеген мың ауыл шаруашылығы құрылымы мен миллиондаған үй шаруашылықтары деректерін ұсынуда. Бұл ауқымды іс-шара БҰҰ Азық-түлік және ауыл шаруашылығы ұйымының (ФАО) 10-шы Дүниежүзілік ауыл шаруашылығы санақтары бағдарламасы аясында өткізіліп жатыр.

Ауыл шаруашылығы санағы аграрлық саланың қазіргі жағдайын жан-жақты бағалауға, ауыл шаруашылығы субъектілерінің нақты мүмкіндіктерін анықтауға және мемлекеттік саясатты жетілдіруге бағытталған маңызды құрал болып табылады. Жиналған мәліметтер аграрлық секторды дамытуға, субсидиялау мен қолдау шараларын тиімді жоспарлауға, сондай-ақ ауыл шаруашылығының тұрақты дамуына ықпал етеді.

Санақтың онлайн-кезеңі 2025 жылғы 1–31 тамыз аралығында өтіп жатыр. Қатысу үшін sanaq.gov.kz ресми сайтына кіріп, ЭЦҚ, SMS-код немесе eGovMobile қосымшасындағы QR-код арқылы авторизациядан өту қажет.

Анкеталар екі топқа арналған:

- ауыл шаруашылығы кәсіпорындарына;

- жеке қосалқы шаруашылықпен айналысатын үй шаруашылықтарына.

Анкеталарда жер иелену, мал басы, техникамен қамтылу, өнім өткізу және жұмыспен қамту мәселелері қамтылған. Барлық деректер автоматты түрде сақталып, онлайн-формат респонденттер үшін қолайлы жағдай жасайды.

Қолдау үшін SANAQ мырза чат-боты, сондай-ақ тәулік бойы жұмыс істейтін 1446 байланыс орталығы қызмет көрсетеді. Сонымен қатар, ел бойынша 2684 өзіне-өзі қызмет көрсету нүктесі ұйымдастырылған.

Ауыл шаруашылығы санағының аяқталуына небәрі 10 күн қалды. Барлық ауыл шаруашылығы субъектілері мен үй шаруашылықтарын уақытылы қатысып, маңызды статистикалық деректерді ұсынуға шақырамыз.