Жамбыл облысының прокуратурасы ірі цемент экспорттаушысының логистикалық кедергісін жойды

Жамбыл облысында Инвесторлардың құқықтарын қорғау комитетінің үйлестіруімен прокуратура ірі инвестор — «KorCem» ЖШС-нің трансшекаралық экспорт мәселесін шешті. Бұған дейін кәсіпорын цемент өнімдерін Қырғыз Республикасына экспорттау кезінде бірқатар қиындықтарға тап болған.

Аталған проблема облыс прокурорының Қордай ауданында бизнес өкілдерімен өткізген кездесу барысында көтерілген.

Мемлекеттік шекарадағы кідірістер салдарынан экспортқа бағытталған жобаның жеткізу кестесінің бұзылу қаупі туындаған.

Мәселені жедел шешу мақсатында прокуратура Шекара қызметімен және Мемлекеттік кірістер департаментімен өзара іс-қимылды ұйымдастырды.

Нәтижесінде мемлекеттік шекарадағы альтернативті өткізу пункті арқылы экспорттық ағындарды қайта бағыттауға мүмкіндік беретін құқықтық тетіктер айқындалды.

Қадағалау органының араласуының арқасында «KorCem» ЖШС цементті үздіксіз жөнелтуді қамтамасыз етіп, жеткізу көлемін арттырды.

Өңір экономикасы үшін маңызы бар инвестициялық жобаларды сүйемелдеу жұмыстары жалғасуда және ерекше бақылауда.