Мемлекет басшысы отбасы институтын, әйелдер мен балалардың құқықтарын қорғауды қамтамасыз етуге бағытталған заңға қол қойды

Негізгі өзгерістердің бірі - бұрын әкімшілік құқық бұзушылық ретінде танылған ұрып-соғу және отбасылық зорлық-зомбылық қазір ауыр қылмысқа жатады. Бұл дегеніміз, бұл әрекеттерді жасаған адамдар қылмыстық жауапкершілікке және қатаң жазаға тартылады.

Тұрмыста орын алатын аса ауыр қылмыстар үшін жауапкершілік күшейтілді. "үй тирандарын" үйден 30 күнге оқшаулау және жәбірленушімен байланысқа тыйым салу мүмкіндігі енгізілді.

Заңнамалық жаңалықтардың бір блогы кәмелетке толмағандарға қарсы қылмыстар үшін жазаны қатаңдатуды қамтиды. Қазақстан қоғамы күткен маңызды норма Қылмыстық кодексте көзделген ең ауыр жаза — педофилдер мен балалар өлтірушілер үшін өмір бойы бас бостандығынан айыруды енгізу болды.

Осы Заңмен кәмелетке толмағандарға қарсы денсаулыққа зиян келтіруден бастап, ұрлау мен өлтіруге дейінгі қылмыстардың барлық түрлері айқындалды және сараланды. Мұндай қылмыстар үшін татуласуға байланысты қылмыстық жауаптылықтан босату мүмкіндігі алынып тасталды.

Кәмелетке толмағандарға қатысты жыныстық зорлық-зомбылық пен суицидке көмектесу үшін қылмыстық жауапкершілік енгізілді. Кәмелетке толмағандарды қорлау және кибербуллинг үшін әкімшілік жауапкершілік енгізілді. Оған сыныптастарын қорлайтын жасөспірімдердің ата-аналары мен қамқоршылары тартылады.

Ішкі істер министрлігінде отбасындағы зорлық-зомбылыққа қарсы күрес жөніндегі мамандандырылған бөлімше құрылатын болады. Мәдениет және ақпарат министрлігінің Жастар және отбасы істері комитеті осы бағыттағы мемлекеттік отбасылық саясатқа жауапты болады. Қазіргі отбасын қолдау орталықтары қайта құрылады.

Бұл шаралардың барлығы тұрмыстық зорлық-зомбылық құрбандарын қолдауға және жалпы зорлық-зомбылыққа төзімділіктің нөлдік деңгейіне жетуге бағытталған.

Айта кету керек, 2024 жылғы 16 сәуірде Біріккен ұлттар ұйымы аталған заңды қабылдағаны үшін Қазақстанға ризашылығын білдіріп, бұл гендерлік зорлық-зомбылықтың барлық нысандарын жою жолындағы маңызды қадам болғанын атап өтіп, осы заңды тиімді енгізу және қолдану жөніндегі күш-жігерді жалғастыруға шақырды.