Қазақстан мен Тюрингия экономикалық байланыстарын кеңейтуді жалғастыруда
Эрфурт, 2024 жылғы 12 наурыз. Сейсенбі күні Тюрингия федералдық мемлекетінің астанасы Эрфурт қаласында Қазақстан-Тюрингия дөңгелек үстелі өтті.
Қазақстан тарапынан ҚР Индустрия және құрылыс вице-министрі Олжас Сапарбеков бастаған үкіметтік делегация қатысты. Делегация құрамында сондай-ақ ҚР Көлік министрлігі, Қарағанды қаласы әкімдігінің, «QazIndustry Қазақстандық индустрия және экспорт орталығы», «Kazakh Invest», «Қазавтожол», «Qaz Textile Industry» және жеңіл өнеркәсіп кәсіпорындары қауымдастығының өкілдері болды.
Бұл 2023 жылғы сәуірде Тюрингия делегациясының Астана мен Алматы қалаларына жасаған сапарынан кейінгі сапары болып табылады және тараптардың бұрын қол жеткізген уағдаластықтарды жүзеге асыру, сондай-ақ ынтымақтастықтың жаңа мүмкіндіктерін анықтау бойынша одан әрі бірлескен жұмысына өзара мүдделілігін көрсетеді.
Іс-шараны Тюрингияның Экономика, ғылым және цифрландыру министрі Вольфганг Тифензее және Даму агенттігінің (LEG) директоры Андреас Крей ашты.
Өзінің кіріспе сөзінде министр Тифензее Тюрингия Қазақстанмен ынтымақтастықты нығайтуға өте мүдделі екенін және Қазақстан Республикасын Орталық Азия аймағындағы федералдық жердің негізгі серіктесі деп санайтынын атап өтті.
Күн тәртібінде Қазақстанның жеңіл өнеркәсібі үшін инновациялық технологиялар саласына инвестиция салу, кәсіптік білім беру және Қазақстан-Германия кәсіптік оқыту орталығын құру, сондай-ақ энергия тиімділігі мен жол құрылысы мәселелері қаралды.
Іс-шара барысында Қазақстан мен Тюрингия компаниялары арасында тұрғын үй-коммуналдық шаруашылық саласындағы энергия тиімділігін арттыру, кәсіптік білім беру және жол инфрақұрылымы саласындағы ынтымақтастық туралы бірқатар меморандумдар мен келісімдерге қол қойылды.
Анықтама: Тюрингия — Германияның шығысындағы экономикалық дамыған федералдық жерлерінің бірі. Жердің пайдалы қазбалары бар. Мұнда тақтатас, тас тұзы, калий оксиді, қоңыр көмір өндіріледі. Тюрингияда инвесторлар тау-кен өнеркәсібі, өндіріс және автомобиль өнеркәсібіне инвестиция салады. Жоғары технологияның жекелеген бағыттары да дамуда (оптоэлектроника, биотехнология). Ірі компаниялар негізінен Йенада (Zeiss, Jenoptik, Schott) және Айзенахта (Opel, Bosch) орналасқан, ал Эрфурт өзінің әртараптандырылған құрылымымен федералдық жердің ең маңызды экономикалық орталығы болып табылады.
Тюрингияда төрт университет пен екі қолданбалы ғылым университеттер орналасқан. Мәдени орталығы Ваймар қаласы болып табылады, онда дизайн және техникалық салаларда маманданған атақты Баухаус университеті, музыкалық колледж және ЮНЕСКО-ның дүниежүзілік мұрасы бар.